Oranjestad: Despues di un eleccion sumamente importante pa pais Aruba diabierna ultimo, unda cu Partido si Pueblo Arubano AVP a logra obtene 7 asiento pa e siguiente gobernacion, a warda ansiosamente pa e votonan individual di cada un candidato. Sra Jennifer Arends-Reyes, un candidata prominente riba e lista berde y cu a hiba un campaña honesto cu hopi energia positivo a logra obtene 530 voto. Sigur un cantidad di voto cu Jennifer ta agradecido pe, logrando asina mantene di keda top 3 di ‘female votegetter’ di partido AVP.
Un eleccion cortico y sigur riba man pa cualkier partido cu a prepara pa un eleccion na September, sinembargo, no obstante tur e obstaculonan riba caminda, Jennifer a hiba un campaña digno di su representacion den Parlamento. For di 2013 Arends-Reyes ta riba lista di AVP, debutando asina na #20 y a logra drenta Parlamento cu 608 voto tras di su nomber. Den Parlamento Jennifer a sa di traha duro pa presenta varios mocion entre otro ariba e tereno di cuido pa nos muchanan, incentivo fiscal, studiantenan, labor y hobenan y Turismo y a logra esaki tambe cu mayoria voto na fabor. Na 2017, Jennifer a subi di number y a bai eleccion ocupando #10 y a logra 588 voto. Por bisa cu practicamente a mantene su sostenedornan.
Diabierna ultimo Aruba a eherce nan derecho di voto. Jennifer a presenta su mes na Colegio Ora Ubao conhuntamente cu un grupo grandi di su simpatisantenan pa e por a eherce su voto. Hunto cu su casa Ricky y nan yiu muher, Jennifer a vota riba #11 pa un mihor Aruba. Ansiosamente a warda e resultado individual y Aruba a sa un biaha mas sostene Jennifer cu 530 voto. Si nos analisa demas candidato y otro partido, apesar di tur e contratiempo, y perdiodo cortico mas e atakenan continuo na partido AVP, Jennifer ta agradecido na cada un persona cu a keda kere den su persona , y a dun’e un voto, un voto di confiansa pa continuidad den e area politica.
Si nos analisa e candidatura y votonan individual pa partido AVP, Jennifer a ocupa su mes na puesto number 8 cu mas voto ricibi pa cu eleccion y ta den top 3 ‘female vote-getter’ pa su partido. Pa Jennifer ta hopi importante e mandato di pueblo y di por a mira e votonan na su persona, e ta un yamada cla pa continua cu su persona den Parlamento. E simanan nos dilanti lo ta hopi crucial pa determina si Jennifer na final lo logra keda cu un puesto conforme e deseo di pueblo. Por ultimo Jennifer kier un biaha mas gradici su campaign manager, Teamjennifer y tur cu a cana cune di cas pa cas, combersa y scucha e pueblo su dolor y preocupacion. Un campaña husto y honesto pero cu e compromiso na su pueblo di sigui traha y lucha pa prosperidad aki na Aruba, un politico ‘determina cu firmeza’. Danki Aruba!
