Ultimo tempo nos a bishita bastante cas, tene hopi reunion di contacto y papia cu hopi empleado den husticia, caminda basicamente loke nos ta tende tur caminda ta mesun cos.

Pueblo kier un cambio y sin duda nan grito pa cambio tambe ta relaciona cu husticia, mustrando cu  husticia no por mas sin un cambio!

Na fundeshi di tur esaki ta cu tin malcontento tur caminda, entre empleadonan di husticia, hendenan ta defrauda y demotiva, ya cu a  priminti hopi pero den  3 aña y mey, no a cumpli cu nada cu a wordo proiminti y  cu e ‘legacy’ aki di minister Andin Bikker y MEP-POR-RED,  nos mester bay traha awor. 

Tin hopi mehoracion cu nos kier trece den husticia pero con por haci esaki si e team di empleadonan publico den husticia a wordo neglisha asina largo?

Con por trece mehoracion den servicio si den top di diferente organisacion den husticia, cosnan dudoso y hasta robes ta bira normal y tur hende ta wak y niun ta actua?

Con nos por pidi pueblo pa respeta husticia si algun den husticia cuminsando cu e gobierno saliente y algun den top mes, no ta respeta husticia?

Mester bin un clean up serio y completo den husticia y ya no por sigui warda mas y mi persona a bin di eyden pero mi no ta reconoce mas y mi conoce e aparato hudicial, mi sa con e mester bira, pa e ta digno di confiansa un biaha mas. Con e mester bira pa esunnan cu ta traha den dje por ta orguyoso di nan trabou. 

Algun di e cambionan cu nos kier bin cune ta:

Mester traha mas preventivo. No warda te ora cu e cas kima pa yama brandweer pero evita e cas di kima, no warda pa nan tira atraco pa yama polis,  no warda te ora un hende mishi c’un mucha pa bin den accion, educa, conscientisa, informa y evita semper ta miho cu lamenta. 

Mester traha mas conhuntamente cu otro ministerionan, no warda te ora algo pasa pa e ora ey bin den accion.

Husticia por traha cu enseñansa, deporte, social pa evita cu cosnan mester escala y bira problema pa husticia, evita cu hende ta cay den man di husticia lo ta nos prioridad y yuda esunnan cu a cay caba, pa sali bek y integra den comunidad. 

Dama husticia mester bira ciego atrobe, nunca mas e mag haci distincion entre hende, basa riba nan color politico, nan status den comunidad etc, caminda e dicho di ley pa un, ley pa tur, mester bira normal atrobe.

Mester crea confiansa bek den husticia pasobra sin esaki husticia no por funciona y pa por logra tur esakinan y hopi mas, mester deal cu tur e maldad cu ta parce di a bira normal den husticia prome. 

E instrumento pa trece husticia mes mester un limpiesa pa e por haci su trabou, empleadonan cu pa e ultimo añanan no a wordo scucha, empleadonan cu apresar di ta frontliners a wordo neglisha, empleadonan cu ta sinti cu no ta trata nan husto, empleadonan cu tabatin un gobierno cu a prefera pa sigui tuma hende den servicio te dia di awe, aumentando gastonan na luga di baha su gastonan y premia esunnan cu tabatey ora mas tabatin mester di nan, sin corta den nan sueldo.

Empleadonan cu a haña nan mes ta entrega na luga di wordo reconoci y premia den tempo di pandemia y tur riesgo cu esaki a trece cune pa nan y nan famia. 

Momento a yega caminda mester trece trankilidad bek den husticia si nos kier un husticia di calidad y ta tempo pa cartel den husticia a caba! 

Pueblo lo haña un husticia husto, integro y digno di confiansa un biaha mas,”  Robert Candelaria di  partido AVP a declara.