Den e siman crucial na Augustus 2020 cu decisionnan lo a worde tuma den Conseho di Reino pa cu CHE/COHO e ExPromer Minister di Aruba mr. Mike Eman a haye necesario pa no keda keto y a drenta den e discussion. Mientras Evelyne Wever Croes tabata den un silencio hermetico ExPromer Minister Mike Eman a manda un “open Memorandum” directamente pa Promer Minister Rutte riba 9 di Augustus 2020. Den contexto di preocupacion pa Aruba y Reino ExPromer Minister mr. Mike Eman a haci un apelacion riba aplicacion di curazon y huicio den un open memorandum pa Promer Minister Mark Rutte. E titulo di e Open Memorandum tabata: Het Koninkrijk: Balans tussen hart en verstand. E memorandum di Eman a pone e base pa un sentmiento cu Aruba tin derecho riba cooperacion di Reino na e momento crucial aki pa e pueblo di Aruba. Medianan di communicacion den Reino a duna hopi atencion na e memorandum di Eman pa Rutte. E memorandum di Eman a duna e argumentonan profundo pa re-evalua e forma con Reino kier impone asistencia. Den e virtudnan di combinacion di curazon y huicio, cu historicamente a guia Aruba den e proceso pa su lugar den Reino, e ExPromer Minister di Aruba Mike Eman a mustra cu impone condicionan asina no ta cuadra cu e reglanan di Reino. Awe ExPromer Minister Mike Eman ta haya rason cu conseho di Raad van State. Ta keda awor e tristo realidad cu Aruba su actual Promer Minister Evelyne Wever Croers nunca a hiba un bataya contra di CHE/COHO, per a firma bij het kruisje.
Den e memorandum di ExPromer Minister Mike Eman pa Rutte a mustra anja pasa na Augustus con e nacemento di e pensamento di e modelo structura estal, Status Aparte, cu Aruba, Curacao y Sint Maarten tin awor den Reino ta un producto di pensamento cu curazon y huicio cu a worde principia na Aruba ya den anjanan 30 di siglo pasa.
Eman a mustra cu e ta hopi preocupa pa e relacion actual entre Aruba, Hulanda y Reino. E preocupacion ta wordo fortifica dor di e pandemia COVID 19 cu ta creciendo cu cifranan alarmante tanto na Aruba como na Hulanda. E golpi economico ta wordo sinti den henter mundo, aunke e situacion na Aruba ta diferente ya cu nos ta depende di turismo. Esey ta haci Aruba vulnerabel y mientras Hulanda lo sali mas lihe di e crisis aki, Aruba sigur lo sinti e efectonan mas largo.
Desaroyo di Aruba
Den su memorandum Eman a recorda Rutte con Aruba riba propio forza a desaroyo den un forma impresionante desde e momento cu e a haya su Status Aparte. Eman a accentua cu ora Aruba a haya su status aparte Hulanda no a regala e pais nobo ni un cen preto, ni tampoco a tuma debenan over. Al contrario, Aruba e tempo ey a tuma un parti di debenan over di Antiyas Hulandes y a participa na un fondo di solidaridad pa e islanan chikito (BES yama awendia). Despues di status aparte Aruba a bay biento en popa. Aruba a bira un ehempel pa mundo. Turismo a florece, economia a crece, facilidadnan social y e entrada per capita tabata halto. Tabatin temponan di crisis tambe. Recesion y dos bes ciere di e refineria. Pero, nos a lanta cabez semper bek riba propio forsa.
Interes mutuo
Eman a dirigi su mes na Rutte cu e siguiente palabranan “Mi ta corda, mi amigo Mark, con impresiona bo tabata cu e tantisimo iniciativanan di Aruba ora bo tabata aki y e cooperacion cu institutonan Hulandes. Bo a wak e exito y e potencial di un hub y un cooperacion inovativo. Bo tabata entusiasma y a duna nos speransa y perspectiva riba e tan balioso curazon y huicio.”
Den su memorandum Eman a mustra Rutte con Aruba riba propio forza semper a carga su desaroyo y su contratiemponan. Tambe e reformanan na cual Reino ta referi hopi di nan Aruba riba propio forza y iniciativa ya a introduci. Eman a bisa Rutte cu e no ta kere cu ta hustifica pa introduci podernan di afor riba e gobernacion autonomo di e islanan. Formanan di cooperacion, condicionnan mutuamente accepta y supevision ta uno, pero tuma poder di gobernacion y autoridad ta otro, Eman a bisa Rutte. Awe Raad van State ta duna e argumentonan di ExPromer Minister Mike Eman cu e a utilisa den su Memorandum pa Rutte rason y ta keda e tristo realidad cu Evelyne Wever Croes a firma sin cuestiona.
