Segun Parlamentario Mervin Wyatt-Ras, Parlamento a aproba e cambionan pa implementa nos Codigo Civil of “Aanpassingsverordening aanvulling Burgerlijk Wetboek van Aruba”. Dicho ley cu a drenta Parlamento dia19 di september 2019, a ser aproba cu 17 voto na fabor y 4 en contra. E “Ontwerplandsverordening tot wijziging van het Burgerlijk Wetboek(BW) (AB 1989 no. GT 100) a ser aproba dia 23 di september di anja 2016. A tuma casi 5 anja pa por trata e concepto di ley pa asina implementa e BW of Codigo Civil.
Den su dissertacion parlamentario Mervin Wyatt-Ras a trece padilanti cu e cambionan den BW ta hopi amplio y cu ta necesario pa nan por bin na vigor pronto. E cambionan a ser treci den diferente buki, entre otro Buki 1, 3, 4 y 7. Buki 1. ta ensera cambio di e “namenrecht”, esta derecho di nomber y fam, cambio di e “huwelijksvermogenrecht”, e hecho cu por asumi e rol como tata den introduccion di “gerechtelijke vaststelling di vaderschap” y cambio di areglo di “ouderlijk gezag” of outoridad di mayor, en especial ora di divorcio. Buki 3 ta trata trust y ta regla “onverdeeld gebleven boedels”. Buki 4 ta trata reforma total di derecho di hereda, ta amplia e derecho di e pareha cu ta keda biba mas largo, esta e “langslevende echtgenoot”. Buki 7 ta trata areglo di compra di cas y di compra riba distancia.
Alabes tin otro cambionan manera: Titel 3: “schenking”, Titel 4: huur, Titel 10: acuerdo laboral (arbeidsovereenkomst), Titel 12 trabou/laboral, Titel 13: “personenvennootschap”, Titel 17 y 18: aseguro y “lijfrente”.
Segun Wyatt-Ras e discucion ora di tratamento di e ley a bai mas dirigi ariba e “geregistreerde partnerschap”, mientras e ley ta ensera mas aspecto.
E cambionan ta ensera alabes derecho y obligacionnan di esnan cu ta casa y ta stipula cu gastonan di cuido y educacion di muchanan ta na encargo di e mayornan casa. Aki ta mustra cu mayornan mester carga responsabilidad pa nan yiunan. Ta indica cu un persona of un mucha tin derecho di sa ken ta su mayor biologico. Esaki ta hopi importante pa desaroyo di un mucha y den caso e dicidi cu e kier wordo reconoci dor di su tata, esaki mester ta posibel. E tata, den caso e ta den un otro matrimonio, e por reconoce su yiu. Tambe ta stipula cu ora huez dicidi encuanto “vaderschap” (of ken ta e tata) e por exihi pa e tata duna un aporte den gastonan di educacion y cuido di e mucha, igual den gastonan di mantencion y di estudio. Esey ta di importancia pa desaroyo di un ser humano. Den otro articulonan ta duna e mama mas derecho, p.e. ora di haya fam tin e mucha tin opcion pa carga tambe fam di e mama of combinacion. Pa loke ta trata Titel 13. ta agrega e “Advies- en Meldpunt voor Kindermishandeling” y ta describi su tareanan. Tambe tin un articulo cu ta trata e outoridad di mayornan of “ouderlijk” gezag. E outoridad di mayornan ta ensera obligacion di e mayor di cuida y educa su yiu. Mayornan tin cu carga responsabilidad pa bon cuido y educacion y zorg pa e bienestar fysico y mental di nan yiu y garantisa su seguridad, tambe tin cu promove desaroyo di su personalidad. Den cuido y educacion di e yiu mayornan no por uza ni violencia fysico ni mental of cualkier trato denigrante. Esaki ta segun tratadonan internacional, saliendo na vanguardia di nos muchanan. Pa loke ta trata outoridad di mayornan den matrimonio y tambe pafo di matrimonio y ora di divorcio mester tin outoridad conhuntamente of “gezamenlijke ouderlijk gezag”. Ora tin discucion huez por dicidi. E ora emayor cu ta cuida su yiu miho por haya e outoridad aki.Ta stipula cu un mucha tin derecho riba “omgangsregeling” of un areglo di relacion cu su mayornan. Den caso un mucha cu ta sigui estudio no finalis’e ora e yega 21 anja, e mayornan ta obliga na otorga costonan di mantencion y estudio te na edad di maximo di 25 anja. Wyatt-Ras a trece padilanti e “Verlof di Embarazo y Parto” y e derecho pa “kolf” lechi y duna lechi di pecho na pia di trabou. E cambionan describi a ser aproba dor di Parlamento varios anja pasa den un ley di iniciativa, di cual Wyatt-Ras mes tabata inciador di e cambio di ley. Tambe a regla “Vaderschapsverlof” di 2 dia y trato igual na trabou, esta cu no por discrimina a base di parto ni sexo ni situacion na cas. Tampoco no por tin conotacion seksual of trato den cual ta denigra of ofende un otro persona na pia di trabou.
Den cuadro di e aspecto di Geregistreerd Partnerschap, Wyatt-Ras a menciona su colega e
tempo ey, Sra. De Sousa-Croes, kende a presenta un amienda al respecto, cual amienda a
conoce diferente cambio y a keda aproba na september 2016. Pa personanan cu no ta casa,
of sea di diferente sexo of di mesun sexo por yega na areglo pa nan bida. Esaki lo proteha
cuidadanonan cu a biba cantidad di anja hunto y nunca no tabatin cierto derechonan. Wyatt-Ras a trece padilanti e hecho cu segun e “Europees Verdrag voor de Mensenrechten” (EVRM) si no regla e asunto di “geregistreerd partnerschap” Aruba no ta cumpli cu ni articulo 8 ni 14, cualnan ta regarda proteccion di bida priva y prohibicion di discriminacion. Alabes tin diferente jurisprudencia den e caso aki. Wyatt-Ras a conta di su experencia cu ayudo di hobennan homoseksual den cual aceptacion y stimulacion dor di mayornan tin miho resultado psycho-social cu ora tin descontento y rechaso. E hecho cu ta “bully” esnan cu preferencia pa mesun sexo ta condenabel y tin hopi consecuencia psycho-social. Wyatt-Ras ta haya cu no mag mescla e discucion encuanto “geregistreerd partnerschap” cu religion. Paso segun Wyatt-Ras na final di dia tur hende ta yiu di Dios sin ningun distinccion.
