Un plan integral pa percura pa cuida naturalesa y na e mes momento stimula economia, esaki ta locual a trece AVP na e prioridad aki pa un gobernacion nobo pa Aruba, e lider di AVP, mr. Mike Eman a splica na apertura di e branstorming session cu a worde teni cu mundo di proteccion di medio ambiente, monumenten fonds, archtectonan y mundo di construccion.
E lider di AVP, mr. Mike Eman a splica cu a invita concientemente sectornman cu hopi biaha ta na puntonan opuesto: ambientalistanan y construccion. Di un banda, defensornan di medio ambiente no kier wak mas desaroyo urbano; mientras cu construccion hustamente ta depende di mas inversion y proyecto den e pais. AVP ta bin cu un propuesta caminda ta percura pa un harmonia entre ambos, y na mesun momento, ta stimula e economia di nos pais.
AVP ta consciente cu den comunidad ta biba un preocupacion pa no continua cu e modelo economico basa riba mas edificio nobo. Durante e sesion ‘Pensa, Scucha y Recupera Miho’ e partido politico a papia cu ambos gremio di un concepto caminda, basa riba e experiencia y durante un periodo di cuater pa ocho aña ta enfoca riba e rescate, restauracion, renobacion y remodelacion di edificionan existente; tanto publico, como priva.
“Y pa haci esey, nos ta kere cu gobierno nobo mester bin cu incentivonan fiscal cu nos a prepara como parti di henter oferta aki di stimulo economico,” e ex prome minister a bisa. “Nos sa cu den pasado, ora cu refineria a cera, construccion di hotel a yuda masha hopi mes y despues a bira e cuadro riba cual e economia di Aruba a draai. Nos sa cu nos no kier bay mas den e direccion ey, pero si mester crece y mester tin trabou. Hopi hende den construction a perde trabou. Un parti di e modelo di recuperacion cu nos ta presenta, ta caminda lo busca fondonan internacional na Europa y Merca pa restauracion, mescos a haci cu watertoren na Playa y San Nicolas. Tin hopi fondo den mundo pa juda cu restauracion y e pensamento berde di desaroyo sostenibel.”
Un ehempel cu e lider di AVP ta duna ta e edificio di DIMAS cu cual a scapa miyones di florin si mester a construi un nobo. Den gobernacion anterior di AVP a mustra cu por enfoca riba renobacion y restauarcion pa haci Aruba mas atractivo, crea trabao y na e mes momento cuida nos naturalesa. Si haci esaki bon no lo tin mester di haci yamada riba nos areanan di naturalesa pa desaroyo economico den construccion pa e siguiente anjanan. Asina gobierno di AVP a renoba barionan manera Juana Morto, Jara, Pos Chiquito, de Vuyst, Village. Tambe a pone infrastructura mas atractivo den hopi barrio manera Madiki, Noord, Seroe Patrishi.
Un cantidad di schoolnan monumental gobierno di AVP a restaura, manera La Salle College, Dominicus College, Rosa College, Abraham de Veer School, J.F. Kennedyschool etc. Tambe un cantidad di edificionan monumental Gabinete Mike Eman I y II a restaura, manera Watertoren Playa, Water Toren San Niocolas, Edificio di Corte, Havenmeester Kantoor, Edificio Zoutmanstraat “Cosecha” y mucho mas. E propio Cocolishi, traha riba area den desaroyo ta un ehempel di renobacion, impulso economico, creacion di trabao sin tuma mas spacion di naturalesa. Esaki tambe ta conta pa espacionan publico manera Linear Park y tur canchanan deportivo cu AVP a traha den barionan. E ta un prueba cu tin manera pa logra e desaroyo aki sin mester tuma mas areanan di naturalesa pa impulsa desaroyo economico. Pa medio di e modelo aki, tur bario cu gobierno di Gabinete Mike Eman I y II a renoba, tur edificio cu a drecha ta traduci den cantidad di metsla, carpinte, pipefitter, di persona cu ta pone airco; y te na e truck of esun cu ta drecha e tire di e truck; en fin, un circulo grandi di trabou cu na e momento aki, y pa 4 aña caba ta stagna paso no tin vision, ni pensamento con pa duna e stimulo aki na economia di Aruba.
Presente na e dialogo tabata, Helga Rodriguez Taekema di Directiva di Flora y Fauna Aruba, arkitectonan Joel Croes y Raffi Kock y ing. Anne Witsenburg di Monumenten Fonds. Di parti di partido AVP, mr. Mike Eman, Lider di Partido, Marlon Sneek, Lider di Fraccion, Robert Candelaria, parlamentario, mr. Gerlien Croes, Fundacion Mito Croes, mr. drs Franky Hoevertsz, Fundacion Digna Lacle Herrera mr.dr. Rycond santos do Nascimento.
