Aña 2021 a habri y e unico mensahe cu Prome Minister Evelyn Wever tabatin pa pueblo di Aruba, ta cu e aña aki ta bay ta un aña di recuperacion.
Melvin Tromp di Partido AVP a enfatisa cu mucho mas Prome Minister no por a bisa ya cu ainda Evelyn mes no sa kico y con e recperacion aki ta bay ta, ya cu en realidad desde 2017 cu su gobierno a cuminsa goberna, nunca tabatin un plan di gobernacion.
“Aki tin cu mustra tambe cu Prome Minister ta papia di recuperacion pero ainda su gobierno no a presenta Presupuesto 2021 na Parlamento, pues ta con e ta papia di recuperacion sin ainda e no sa kico e tin pa gasta y con pa gasta esaki.
Pueblo henter por a mira con Minister Hulandes, Raymond Knops practicamente a fungi como voceru di gabinete Wever Croes, anunciando cu pa mey mey di aña Hulanda lo no duna placa mas pa FASE, loke lo nifica cu miles di hende lo keda sin entrada y hasta ayudo na Rode Kruis pa loke ta pakete di cuminda y carchi pa cumpra comestibles na supermecadonan, tambe lo caba na mes momento.
Unico cos cu Prome Minister por a haci ta di scucha c’un smile riba su cara, mira den su cellular y sacudi cabes, practicamente confirma loke Knops tabata bisando pueblo.
Pa colmo ora cu a spera cu e mesun dia of e dia siguiente Prome Minister y su gobierno lo anuncia kico nan lo bay haci pa percura pa sigui yuda pueblo cu ta pasando den momentonan sumamente dificil den e pandemia cu tin, nada a wordo bisa y por saca e conclusion cu loke Knops a bisa, esey ta bay ta.
Na 2009 ora cu gabinete Mike Eman I a tuma mando di e pais, hayando un pais na werki, cu hopi hende den problema financiero, a introduce entre otro e ‘reparatie toeslag’ cu mientras tanto a keda existi solamente pa number ya cu medidanan impone pa gabinete Wever Croes, practicamente tabata un forma di gobierno tuma bek e reparative toeslag aki, cu aumento di costo di bisa hamas bisto akin a Aruba.
Minister Knops a papia, Minister Knops a bisa loke ta bay pasa mientras cu doño di cas representa pa Prome Minister, a keda keto, guli manda abou demostrando un biaha mas cu autonomia di nos pais, ya no ta existi.
Ta algo remarcabel cu ta e minister Hulandes ta esun cu ta mustando Evelyn con su gobierno tin cu sigui goberna ya cu realmente gabinete Wever Croes no tin nada pa mustra pueblo kico a wordo haci den e casi cuater aña na poder.
Pueblo ya a mira cu Partido MEP a cuminsa concentra tur atencion na campaña electoral, repartendo serbete, flanel di e partido pero e ayudo mes cu e mester duna un pueblo cu ta pasando den preta formalmente simplemente no tin pa pueblo.
Knops a yega Aruba pa mira si gabinete Wever Croes a regla loke nan a ordena Prome Minister pa regla, entre otro di oficialnan di gobierno Hulandes cu ta bin Aruba pa dirigi finansa di nos pais, pa bisa gobierno kico e por y kico e no por haci.
MEP lo drenta barrio y algun caminda a haci esaki caba pero kico nan tin pa priminti? Cu nan lo bay duna pueblo loke e merece pa Alivia e castigo cu e partido aki mes a impone riba pueblo?
No tin maneho, no tin vision, no tin un plan di gobernacion y ta solamente esunnan cerca di gobierno aki, sostenedonan, sponsornan, amigo y famianan, ta esunnan cu a conoce beneficio di e gobierno di Prome Minister Evelyn Wever Croes.
Pueblo tin cu sinta warda riba un otro gobierno, un gobierno di AVP cu semper a goberna yudando gruponan den comunidad mas vulnerable mientras cu Evelyn ta bisa pueblo cu 2021 lo ta un aña di recuperacion pero sin solucion con pa haci esaki,” Melvin Tromp di partido AVP a declara.
