Diaranson anochi un delegacion di Partido di Pueblo Aruba (AVP), consistiendo di Lider mr. Mike Eman, Parlamentaria Jennifer Arends Reyes, Parlamentarionan mr.drs. Richard Arends y Robert Candelaria. E commission a worde asesora pa drs. Rene Herde, hunto cu representantenan di Plataforma Hobennan Profesional, Wendrick Cicilia, Gerick Croes, David Quand, Fundacion Mito Croes pa Estudionan Social Cristian Aruba, mr. drs. Franky Hoevertsz y Fundacion Instituto Formacion Politico Digna Lacle Herrera, mr.dr. Rycond Santos do Nascimento a reuni den Renaissance Convention Center cu un grupo di hobennan profesional cuidadosamente selecta. E obhetivo di e encuentro tabata pa scucha nan perspectiva riba e situacional actual di pais Aruba y kico ta e cambionan cu nan lo desea di mira den diferente sector.
Lider di AVP, mr. Mike Eman a splica cu Aruba ta para na un momento cu hopi mester y por worde haci riba e caminda di recuperacion di Aruba. Como cu riba hopi tema nos ta bek na un nivel di base e trabao ta grandi, pero e oportunidad pa duna un contenido destinto na desaroyonan den nos Pais cu lo haci nos felicidad mas completo y duradero tambe tey. Segun Eman e generacion nobo mas cu tur tin e derecho di influencia e escohecinan aki cu nos mester haci. Nan lo ta esnan cu lo traha, biba y lanta nan famia den e Aruba di futuro. Pesey nos ta aki awe, Eman a biasa, pa scucha e hobenan pensamento con nos ta bai atende cu duna forma na e rescate di Aruba y crea e Aruba Nobo cu nos ta desea. Pa esey nos mester yega na un causa comun nobo, carga dor di henter sociedad y cu un influencia grandi di pensamento y prioridanan di nos hobenan. Mr. Mike Eman ta bisa cu pesey a invita e hobenan pa e session di brainstorming aki y a haci esaki hunto cu e Plataforma di Hobennan Profesional (PHP) di partido.
Prome panelista tabata Tracey Werleman, graduado como Bachiller den Trabou Social y Desaroyo. El a elabora riba potencial di hobennan y con esaki ta bisto den esnan cu ta resalta pafo di nos fronteranan, sinembargo hopi ta esnan cu ta regresa Aruba, pero ta haya hopi dificultad pa haya un trabou; e asina yama ‘Brain Drain’ cu a keda bin dilanti durante e resto di e encuentro.
Su tras a hiba palabra Jonathan Henriquez, graduado como Bachiller den Arte, Organizacion, Gobernacion y Gerencia. Henriquez a trece dilanti e retonan financiero, pero tambe den termino di contenido cu studio na Aruba ta presenta na e hoben. E lo desea di wak cambionan den materia cu por prepara e hobennan di un manera mas integral.
Siguientemente a scucha pensamentonan di Judrick Gario, den calidad di empresario. El a indica cu na Aruba tin falta di informacion apropia di accesibel pa hobennan por tuma un decision consciente di ki tipo di estudio pa scoge. Tambe a boga pa un miho usa di innovacion den enseñanza. Tambe a toca e parti di con hopi hoben ta drenta mercado laboral pa aporta na entrada di cas, y ta hay’e pega den dje cu no ta continua cu su estudio.
Jonathan Trinidad, graduado como Bachiller den Trabou Social tabata e siguiente panelista a enfatisa e importancia di investigacion pa conoce e berdadero situacion y necesidadnan di nos isla. Tambe Trinidad ta di opinion cu ta sumamente importante pa inculca e Metanan di Desaroyo Global di Nacionnan Uni pa cambia e mentalidad.
A sigui cu Mirzah Manga, kende ta un empresario creativo y bailarin artistico. Su punto principal tabata e falta di un entidad pa formacion artistico. Motiva esnan cu tendencia pa arte pa desaroya nan talent na luga di limita nan opcionnan na profesion tradicional. Manga tambe ta di pensamento pa amplia e materianan duna na scol pa inclui topiconan di salud mental cu den future ta aporta na e exito di e individuo.
Por ultimo, a hiba palabra Rubiela Gracia, graduado como Bachelor in Psicologia. E ta sugeri pa un preparacion mas extensive den scol secundario riba e oportunidadnan academic. E guia actual no ta duna suficiente bista riba e mundo di opcionnan cu tin ey’fo.
A continua un sesion di pregunta y brainstorming caminda tur esnan presenta a intercambia di ideanan. E anochi ta forma parti di un serie titula ‘Scucha, Pensa, Recupera Miho’ cu cual e partido ta consulta stakeholder for di terenonan medico, comercial, social, enseñanza, entre otro, pa yuda formula un plan strategico cu ta hiban na un recuperacion mas rapido y efectivo pa Aruba.
