Durante conferencia di prensa semanal di partido AVP, parlamentario Mervin Wyatt-Ras a elabora encuanto e ultimo “brainstorming session” di partido AVP. Hunto cu colega Arthur Dowers y lider di partido a organisa e evento aki dia 12 di november ultimo. E tema cu trata ta  seguridad social y oportunidad igual. 

Desde augustus ultimo a bin ta trata diferente topico. A trata salubridad publico y COVID 19, a trata economia y nos turismo y awor a toca e turno di atende cu sector social. Durante e session tabatin diferente persona cu a duna nan presentacion. A toca na promer lugar na representante di Departamento pa Asuntonan Social den persona di sr. Gino Marchena, beleidsmedewerker cu mas di 30 anja di experencia,  pa elabora encuanto di pobresa. Con bo ta reconoce pobresa, ki tipo di pobresa tin y con pa anda cu pobresa. Tambe el a duna informacion encuanto di desigualdad y con pa anda cu esaki. El a trece padilanti cu ta importante pa defini pobresa. Ta di importancia pa midi e calidad di desaroyo necesario di un persona anto eynan bo ta wak kico e tin na entrada, e calidad di cuido di salud, ensenanza, aspectona di cuido social, su ambiente natural, y e percepcion y satisfaccion. Tin diferente definicion di pobresa. Tin definicion unda ta wak e entrada di e persona. E persona en cuestion no por cumpli cu necesidadnan basico, maner awa, coriente, vivienda y cuminda. Tin e definicion di pobresa relativo. Aki e persona cu su entrada por cumpli cu e necesidadnan basico.  Sinembargo no por cumpra mas cu esaki. 

Tin alabes pobresa subhetivo. Aki ta trata di con  e persona en cuestion ta experencia su situacion. E persona por tin suficiente den su cartera pa sobrevivi pero su percepcion ta diferente. Na 2010 a sali na cla cu cada 1 di 4 famia na Aruba por ser categorisa como pober. Esey ta un cifra basta halto pa nos comunidad. Diferente gobierno a purba yuda e situacion aki. P.e. gobernacion di AVP a duna reparatietoeslag, hisa bijstand, duna schoolkinderentoeslag, nos grandinan a haya mas pensioen. Na momento cu COVID a bati na nos porta nos pais a haya su mes confronta cu un situacion peor, den cual 37.000 persona a perde trabou y e ora departamento pa Asuntonan Social a ser confronta cu mester duna mas pakete di cuminda y a introduci FASE. Pa FASE na inicio 10.000 hende a inskribi pa bin na remarke pa esaki. Ora a introduci Loonsubsidie via di SVB, un cantidad di personan a bai over na esaki y e cantidad registra pa haya un suma for di FASE a baha te na mas o menos 3000. Per oktober tin mas o menos 22.000 persona cu ta cobrando loonsubsidie. Ta resulta cu esnan cu ta mas vulnerable tambe ta e mayornan soltero, especial e mama soltera. Tambe nos grandinan ta un grupo hopi vulnerable. A traha conhuntamente cu Fundacion pa nos comunidad pa esnan cu no ta bin na remarca pa un suma di gobierno por haya un pakete di cuminda. Fundacion pa Nos Comunidad su directora, sra. Gianaika van der Biezen durante su presentacion a ilustra con nan ta traha di serca cu nos comunidad y cu nan ta contra cu un cantidad di boluntario cu a join pa yuda nan. Ta traha hunto cu otro instancia y cu Rode Kruis. Hunto ta yega na esnan den necesidad. Ta haya necesario pa e cooperacion por continua y por ser fortifica. Tambe ta constata cu e mama soltera ta resulta esun mas vulnerable den nos comunidad na e momentonan aki.  

Witgele Kruis su representante Monique Labad-Giela a duna un presentacion encuanto e proyecto cu ta sostene mamanan teenegar, pues mamanan cu ta ta sali na estado y ta haya nan baby na edad hoben. Ta importante pa fortifica e grupo aki. Mayoria ta bin tambe di famia di un mama soltera. E grupo aki tabata ariba 100 hoben y awor durante anjanan a baha te na 45 hoben durante e ultimo anjanan. Por bisa cu diferente di e hobennan aki tabata victima di abuso sexual den nan famia p.e. dor di omo padraso, hasta abuelo. Dor di educacion y concientisacion, pa medio di entre otro cursonan, ta trata na yuda e hobennan pa nan tuma rienda di nan famia. 

E representante di Fundacion pa Hende Muher den Dificultad, den persona di su coordinado, sra Magaly Maduro a duna un bista di e situacion di hende muher victimaa di violencia. Aki a trata e topico di igualdad y desigualdad den nos comunidad. A duna un bon bista di con ta traha cu hende muher cu ta ser maltrata y su famia. E cantidad di caso ta 161 y  anja pasa 155. Y ta constata cu durante e pandemia e cantidad di e casonan a subi mirando cu hendenan ta keda paden ta cu e pareha den cas y problemanan ta escala. Nan trabou ta di tal forma cu tambe ta duna informacion, pero tambe carga e pasenshi cu un victima di maltrato no ta tuma e decision asina lihe pa laga su pareha, pero ta keda struggle pa anjanan y ta sali for di e situacion pero tin biaha tambe ta keda den e situacion. E fundacion tin necesidad na sosten pa keda cumpli cu e demanda na yudansa, pa logra nan metanan. Lo haci nan facilidad mas grandi pa atende mas persona den violencia. Sra. Rafini, un trahado social di mas di 30 anja di experencia, a trece su pensamentonan y experencia padilanti. El a ilustra kico el a pasa aden den trabou cu personanan cu p.e. ta sin perspectiva, nan ta pober pa hopi anja. E ta experencia e pobresa di generacion pa generacion. E persona ta den un circulo vicioso y esaki ta hopi dificil pa “doorbreek” of kibra. Pero ta importante pa e futuro generacion wordo mas stimula pa asina si tuma pasonan den bon direccion. Pa nan educa nan mes pa sali for di e pobresa aki. 

Tambe tabatin esnan di e area spiritual cu a duna nan presentacion impresionante. Por bisa representantenan di Outreach y tambe pastoor Jairo di Parokia di Sta. Cruz y antes na Brazil. Nan tin di haber cu hobennan tin biaha sin mucho perspectiva y nan ta yudanan cu tiki cu nan por pa nan por recrea y pasa momentonan agradabel importante pa nan formacion sano. Nan ta yuda hobennan den bario cu e tiki placa cu nan tin disponibel. Ey por mira cu boluntarismo ta importante. Ta yuda otro y ta senjala cu nos mester bai bek na esey. Por logra mas ora nos hendenan ta yuda otro, p.e. ta duna otro un tayo di cuminda of ta mira ora cu nos hobennan ta riba caya. Outreach ta activo tambe cu hende muhernan cu ta adicto y ta yuda nan bai den mihor situacion. Pastoor Jairo a duna su experencianan trahando den parokianan, prome di Brazil y awor den e Parokia di Sta. Cruz. E ta senjala cu tin biaha tin hopi hende cu ta den un situacion dificil pero nan no tin e motivacion pa sigui padilanti. Nan mester di un push y ta importante pa por convivi cu e personanan aki y stimula nan. Como clero e parti spiritual ta importante pa nan por bai padilanti y forma parti di comunidad. A trece padilanti cu nos valor y normanan a bai hopi atras.Nos hendenan antes tabata yuda otro tambe educa nos muchanan. Awor esaki no tey. Dor di esey hopi biaha ta claim gobierno pa actua. E placa no ta yega, nos hendenan no ta yuda otro mas manera antes, a bira mas pa nan mes y awor dor di COVID kizas nos hendenan ta realisa cu nos mester bai bek na cierto valornan y pa yuda otro. Pa asina nos por construi Aruba bek, mirando e situacion dificil aki cu nos tin no solamente na Aruba sino na otro paisnan tambe. Por bisa por lo general e session di Brainstorming tabata un hopi bon anochi y unda cu esnan den sector social hunto cu esnan cu ta traha riba tereno spiritual. E tabata un anochi di union, durante cual tur a busca cierto alternativanan con pa yuda nos comunidad y nos ta keda mira central pa stimula nos hendenan pa sali for di pobresa y situacion di desigualdad. Pa haci esaki a menciona cu educacion ta e yabi cu nos mester bai hinca tur nos energia . Jammer cu durante ultimo anjanan e inversion den educacion a baha. Nos tin cu bai zorg cu esaki no ta e caso pa asina educacion por haya e atencion cu e merece. Por bisa cu e siguiente session cu lo ser organisa lo ta esun tocante ensenjansa. For di aki Wyatt-Ras ta desea coleganan hopi exito cu preparacion di esaki y  gradici tambe pa tur e oradornan y tur esnan cu a bin papia cu nos sin miedo y duna nan imput mirando e interes general di nan grupo cu nan ta traha p.e central. Nos intencion comopartido ta pa  forma nos mes y yega na un vision y plan di maneho pa futuro pa sigui contribui na desaroyo di nos pais Aruba. Un biaha mas Wyatt-Ras a gradici di curason tur organisacion, departamentonan y profesionalnan cu a participa. Spera tambe cu nos por sigui haya e support asina ora nos bati na porta pa por skucha.