Segun Parlamentario Jennifer Arends-Reyes dia 20 di november ta un fecha cu mundo ta para keto un biaha mas ariba e derechonan di mucha. Durante e temporada di Pandemia e muchanan full rond di mundo a sufri hopi a consecuencia cu hopi famianan a keda sin trabou y na Aruba no ta un excepcion. Mayornan a haña nan den situacionan nunca antes cu nan a experiencia sin trabou, hopi menos entrada, cuminda cu ta bira dificil pa yega na dj’e y cu nan mester a sali di nan cas, a perde nan cas, auto y hasta ta bibando sin meter di awa y tin biaha sin coriente. E impacto social y emocional ta grandi riba e famianan. Muchanan na Aruba y mundo henter mester wordo protehi y nan derechonan pa por ta mucha mester ta central. Famianan na Aruba ainda ta pasando hopi trabou y basicamente tur plazo di pago a caba siendo cu e entrada y trabou manera antes no tey. E continuidad y crecimento di Turismo ta depende tambe di con abou nos por logra mantene e casonan activo y miles di trabou y famia ta wardando pa economia por cuminsa draai un poco mihor. Ainda vuelonan ta yegando Aruba pero hopi di e stoelnan ta bashi. Ta temponan sumamente dificil pa mayornan pero e temporada cu e muchanan ta mucha y ta crece no ta bin back mas. Ta sumamente esencial pa e cariño y cuido di nos muchanan keda central den cada cas. Cada mucha tin derecho riba un famia cu conoce amor, cariño pa otro y comprension pa asina nan por desaroya optimalmente, tambe sin lubida pa e cuido di salud di nos muchanan, mester percura pa hiba nan docter of tambe Wit Gele Kruis y pa tuma nan vacunanan pa nan no bira hopi malo. Ya diferente pais conose brotenan pisa di diferente malesanan contagioso di mucha caminda cu nan no tin e aceso na vacunanan. Instancianan y gobierno mester continua di hasi nan mayor esfuerso pa casonan cu ta involucra muchanan tin preferencia y wordo yuda cu urgencia. Si tin pensa di introduci meter di awa pre- pago pa Aruba mester percura pa agilisa e proceso pa introduci esaki pa Aruba pa casnan especialmente cu mucha no mester pasa trabou riba dje pa mantene hygiena tambe den un temporada di pandemia. E alegria y bienestar di nos muchanan ta den man di mayornan y den e temponan insigur aki mester percura pa hasi e maximo esfuerso pa nos muchanan ta sano, feliz y sinti nan mes stima señora Arends-Reyes ta termina bisando.
