Cinco taxista representando tres diferente compania local di servicio di taxi a participa diahuebs anochi na e di dos sesion di brainstorm ‘Turismo den Perspectiva.’ Durante e encuentro aki e profesionalnan finalmente a haya e oportunidad di vocifera nan preocupacion, opinion, pero tambe ideanan pa mehoracion di industria principal. Presenta tambe tabata representantenan di sector hotelero, den un intercambio cu delegacion di Partido di Pueblo Arubano (AVP).
For di A1 Taxi Services tabata presente Rodison Oseana y Ernie de Mei. Di parti di Taxi Address Service TAS a asisti Herny Franken y Franklin Krozendijk, mientras cu for di Professional Taxi Services, a participa Ronny Gomez. E ocasion aki ta e di dos cu e partido ta organisa riba e tema di turismo, despues cu tambe a cubri tema di COVID-19 for di perspectiva di e sector di cuido medico.
Oseana a expresa na final di e encuentro cu nan tabata contento di haya invitacion y a hay’e hopi interesante ya cu taxistanan no ta haya oido hopi biaha. “Nos ta purba hopi anja caba pa busca derecho, pa por duna un miho servicio, pero nos no ta wordo scucha.” E taxista a splica cu ta bin tende di decisionnan tuma ora cu esakinan sali de noticia sin tene cuenta cu nan, despues di inmigracion, ta e prome personanan cu tin contacto cu nos bishitantenan.
Entre e diferente puntonan cu e taxistanan a trece dilanti, ademas di un mayor participacion den e proceso di toma di decision, ta tambe cu nan por aporta cu e punto di bista di e turistanan. P.e. e bishitantenan cu ta yegando nos isla recientemente tin comentarionan mixto. Di un banda ta masha encanta cu e caminda di Watty Vos Boulevard, pero ta desapunto pa falta di atraccionnan nocturno.
Den e aspect laboral, e taxistanan tambe a pidi un miho maneho di nan beneficionan, por ehempel for di SVB pa loke ta trata AO. Nan ta sinti cu nan sector ta den desbentaha compara cu otro empleado y dunador di trabou. “Ta spera cu den futuro tin mas reunion manera esaki, caminda por wordo scucha y cu ta trece solucion,” Oseana a indica. Nan tin mal experiencia cu apesar di trece nan puntonan dilanti, no tin cambio.
E serie di sesionnan aki organisa pa AVP lo continua pa conoce e perspectiva di tur stakeholder riba turismo, economia y mercado laboral, ademas di kico ta nan recomendacionnan pa recupera y recupera miho. E delegacion di e partido ta consisti di lider mr. Mike Eman, Jennifer Arends-Reyes, mr. Gerlien Croes, mr. drs. Richard Arends y drs. Gervai ‘Rene’ Herde.
