Como miembro di e delegacion organisado di e sesion di brainstorm ‘Turismo den Perspectiva’, Parlamentario pa Partido di Pueblo Aruba (AVP) Jennifer Arends-Reyes ta califica e ponencia di tur e sectornan invita como sumamente valido y ta yuda crea un bista di loke nan experiencia y ki recomendacion nan tin.”

E mas reciente edicion cu a enfoca un biaha mas riba e industria principal di nos isla, a tuma luga diahuebs ultimo den Renaissance Convention Center. Otro stakeholders invita y presenta tabata Aruba Timeshare Association (ATSA), Divi Resorts, Federacion di Trahadornan di Aruba (FTA) y varios compania di servicio di taxi.
Despues di e presentacion di cada panelista, e delegacion di AVP tin oportunidad di haci pregunta y/of comentario riba e ponencianan haci. E dialogo aki ta busca pa conoce e perspectiva di tur stakeholders riba turismo, economia y e mercado laboral.

Por ehempel, den e caso di flexibilisacion di leynan laboral cu sector priva ta solicita pero sindicatonan no ta wak necesariamente esaki como un opcion, Parlamentario Arends-Reyes ta di opinion cu mester evalua e scenario den cual Aruba ta recupera mas lihe ya cu Aruba ta keda como un destinacion popular pa e mercado Mericano. Por tin desaroyo positivo cu ta surpasa e proyeccionnan si Aruba keda profila como un opcion cu ta safe.
“Ta keda na comunidad pa nos cumpli cu e parti di protocol estrictamente, y asina recupera na un stap mas lihe di loke a spera,” Arends-Reyes a indica. Otro miembronan di e delegacion di AVP den e organisacion di e encuentronan aki ta lider mr. Mike Eman, mr. drs. Richard Arends y entre otro drs. Gervais ‘Rene’ Herde. Parlamentario Arends-Reyes a confirma cu e sesionnan lo continua den e simannan nos dilanti pa cubri otro sectornan di nos pais