Durante e conferencia di prensa semanal di fraccion di AVP, parlamentario Mervin Wyatt-Ras a reacciona riba locual minister di Salubidad, Dangui Oduber, a trece padilanti. Segun Dangui Oduber pa tur solucion cu gabinete Wever Croes presenta pa algo, fraccion di AVP ta bin c’un problema. Segun Wyatt-Ras esaki ningun momento no ta berdad.
“Minister Oduber mester mira cu fraccion di AVP mester cuestiona ora cosnan no ta bai manera mester ta.
Esaki sosode cu COVID-19. Na momento cu fraccion di AVP no a haya suficiente informacion ariba e asunto a dicidi di organisa un ‘brainstorm session’ cu diferente ‘stakeholders’. Aki na un forma habri y transparente a ricibi hopi informacion cu nos no ta haya den Parlamento.
Pa e motibo aki tambe nos partido ta hopi agradecido na e stakeholders kendenan a bin e session aki pa duna informacion valioso. Nan tin e conosemento cu e politiconan manera e minister di Salud ni minister Presidente no tin. A base di e informacion ricibi por a presenta diferente conclusion y consehonan pa maneho. E consehonan por ser implementa pa anda cu e situacion y proteha nos ciudadanonan y preveni situacionnan den futuro. Partido AVP a dicidi di presenta alternativanan concreto den nan realto pa cualkier gobierno cu cu por tey. Sinembargo por nota cu minister Dangui Oduber no kier esaki tampoco. Hasta el a bai asina leu di culpa partido AVP di a saca un lista di personanan positivo na COVID-19 cu probablemente tabata circulando dor di nan mes den kokoloshi. Ta totalmente for di luga pa minister Oduber reacciona di e forma aki. Ta facil pa critica pero ora bin cu alternativa tampoco no ta bon pa e minister aki.
Wyatt-Ras na varios ocasion a critica e minister riba diferente asunto y cu e no ta contesta preguntanan di su persona.
E minister aki ta gusta bin den prensa pa duna solamente bon noticia, p.e. ora casonan ta bira menos mientras cu ora Hospital y su personal ta bou presion y ta traha durante oranan largo e no ta menciona esakinan.
Recientemente el a bin dilanti y informa cu e cantidad di casonan a cuminsa baha, toque de queda lo wordo adapta y diferente establecimento lo por cera mas lat.
Tin biaha e noticianan aki tin efecto negativo ariba nos pueblo, ya cu nos hendenan por pensa cu awor tin menos caso, por tuma menos precaucion, por bai sali atrobe y asina contagionan por aumenta atrobe. E minister mester keda cauteloso y stimula nos pueblo pa baha e cantidad di casonan ya cu nos pais, aunke nos ta asina chikito nos tin mundialmente e cantidad mas halto di caso per capita.
Ademas nos tin cu tene cuenta cu na e momentonan aki gobernador di New York a introduci medida di cuarentena pa turistanan ora nan bini bek for di Aruba.
Esey sin duda por afecta e cantidad di turistanan cu ta bin nos isla y nos mester ta prepara pa atende cu e situacionnan aki y no solamente canta gloria ora cu casonan di COVID-19 baha un tiki. Nos y e minister mester busca tur forma pa esnan cu a perde trabou of ta temporario na cas bolbe na pia di trabou pa por pone pan ariba mesa di nan famia. Ainda tin cantidad di famia cu ta depende di FASE y loonsubsidie pa mantene nan sernan keri y nos no por canta gloria ainda sino tin cu keda cu condicionnan consecuente o
pa limita contagio. Nos tin cu pone tur cabes hunto pa por hiba nos pais padilanti.
Pa e motibonan aki tambe nos di AVP a extende nos pensamentonan, nos ideanan y asina comparti esaki pa bin cu mehoracion, pero gobierno di su banda tambe mester tin un tono mas positivo pa cu esaki y no bay solamente den defensa y critica.
Den e caso caminda AVP ta bin cu diferente sugerencia, esakinan no ta wordo acepta tampoco y Segun Wyatt-Ras minister Dangui Oduber tin cu cambia su tono y contesta preguntanan cu fraccion di AVP ta manda for di Parlamento.
Wyatt-Ras mes a dirigi un cantidad di pregunta cu no solamente su persona ta inventa pero tambe cu e ta ricibi for di personanan cu ta traha den e setting di salubridad, sinembargo no ta haya contesta. Esaki no ta forma di trata nos di Parlamento cu tin como tarea pa cuestiona maneho di gobierno.
Wyatt-Ras ta spera un otro actitud di Minister pa en berdad por combati e situacion y bin cu solucion na dado momento pa atende cu COVID-19.
