Awe mainta Lider di Partido AVP, mr. Mike Eman y parlamentario drs. Mervin Wyatt-Ras a presenta e relato “COVID-19 DEN PERSPECTIVA” na director di dr. Horacio Oduber Hospitaal, Jacco Vroegop. Na e mes momento a haya e oportunidad di intercambia den terminonan mas general di Hospital y cuido medico cu ehecutivo nombra recientemente.

E Lider di AVP, mr. Mike Eman a splica e preocpacion cu nan tin cu e reto grandi cu Hospital ta pasando aden na e momento aki cu e crisis alarmante di Covid-19 na Aruba.

E presiion aki riba capacidad di hospital ta worde menciona tambe den e relato di partido AVP. E presion ta enorme e ultimo lunanan, door di e crecemento grandi den casonan positivo. E ta un reto pa atende cu tur e pashentnan cu ta yega hospital. “E ta pone un presion grandi riba tur esnan cu ta traha cu e enfermonan infecta cu Covid.”

E presion t’asina enorme cu ta yegando na e punto di capacidad maximo y hopi urgente pa bin cu un expansion di capacidad pa trece un alivio y garantisa cu e calidad di cuido ta sigui. A constata esaki durante un sesion di brainstorming cu AVP a tene riba e tema aki y den contacto cu e mundo medico.  

Partido AVP a tene un serie di consulta cu expertonan medico, social y di enseñansa, pa haya tende di nan con nan a atende cu e situacion cu e enfermedad contagioso aki a crea pa nos bida diario, kico ta e daño cu el a causa, dicon cosnan a bay manera nan a bay for di nan perspectiva y kico mester haci pa nos comunidad ta miho prepara pa crisisnan similar den futuro. E brainstorming aki a tuma luga dia 20 di augustus 2020. Basa riba e informacion cu a wordo presenta door di expertonan, a compila e relato “COVID-19 DEN PERSPECTIVA”. 

Den e relato traha y entrega na director di hospital ta poni cu ta importante pa bini cu un estudio con a maneha e crisis te awo y con por mehora; y na di dos luga, e 35 miyon corta den cuido medico mester bolbe. Nan ta haya cu si mester austerisa na e momentonan aki, Aruba no por permiti su mes pa corta den cuido medico na e momentonan aki. E ta causa fayecimento di ciudadanonan cu no ta haya e atencion debido na Covid-19. 

A papia di e tema specifico cu e director, kende ta orientando su mes riba tur e necesidadnan di e instituto, y a mustra di ta habri pa scucha sugerencianan y mira unda e necesidadnan ta. No solamente a haci entrega di e relato pero a inform’e tambe kico AVP ta sinti ta e prioridadnan pa trece alivio pa e sector aki y cu ta garantisa un bon servicio pa e pashentnan.

E Lider di AVP a recorda cu tin un virus sumamente peligroso eyfo cu a costa bida di hopi ciudadano, unda cu no por despedi cu dignidad di e familiar, lagando trauma atras. Tur hende mester ta hopi consciente cu mientras frontera ta habri e riesgo ta keda existi. “E situacion ta keda uno di emergencia y hospital ta trahando na su capacidad maximo, y por tin consecuencia pa e calidad y continuidad di servicio.”. Tambe AVP ta preocupa cu e otro casonan cu no ta hayando atencion. Pesey den e rapport AVP ta propone tambe pa  traha un plan pa recupera e backlog (atraso) den cuido medico. Dor di e crisis, hopi patient cu malesanan (cronico) cu no tin di haber cu e coronavirus, no ta wordo trata y ta wordo poni riba lista di espera. Hunto cu e sector medico mester inventarisa e efecto di e crisis riba e cuido regular y traha un plan concreto con pa activa e cuido electivo mas lihe posibel, pa asina por recupera e atraso cu a surgi dor di e crisis.

Drs. Mervin Wyatt Ras, miembro di e comision di Salud Publico, a compaña e lider di AVP den e bishita na director di hospital y a keda impresiona pa conocemento di e politico riba e tereno di Salubridad, y a demostra di ta siguiendo e desaroyonan di e sector hopi di cerca. “Tur hende mester ta consciente cu e profesionalnan ta trahando bou presion pa duna lo maximo. P’esey no ta e momento pa corta den cuido. Esey sigur no ta un bon decision. “

E rapport aki ta disponibel riba www.avp.aw. E comision organisado di e encuentronan cu expertonan ta mr. Mike Eman, drs. Mervin Wyatt Ras, mr. Gerlien Croes, Robert Candelaria y drs. Rene Herdé. E comision organisado tabata asesora pa conseheronan drs. Anco Ringeling y mr. Nicole Hoevertsz.