Aruba y mundo henter a conoce e malesa devastador di COVID-19 y miembro di fraccion di AVP, drs Mervin Wyatt Ras, a mustra cu for di dia 11 di Maart ultimo WHO a declara esaki un pandemia.
Dia 13 di maart Aruba a conoce su prome caso di COVID-19. Un dia prome gobierno a bin dilanti pa duna informacion relaciona cu e malesa aki, pero Parlamentario Wyatt Ras a mustra cu for di luna di Januari caba, fraccion di AVP a dirigi varios pregunta na e Minister encarga cu Salud, despues cu den varios parti di mundo, e malesa aki a penetra.
“Apesar cu fraccion di AVP a dirigi varios pregunta na e Minister, nos no a ricibi contesta riba esakinan. Despues di e prome ronda di e malesa nos a haya nos mes cu mas di 100 caso pero awor despues di reapertura di frontera di nos pais, nos a wordo confronta cu un “second wave” cu mucho mas caso.
Den comienso e tabatin di haber cu e forma di test cu tabata wordo haci y e formulario di entry cu ta e formulario medico, riba cual ainda tin pregunta riba esaki y na e momentonan aki nos tin un cantidad di 2006 caso y esaki ta cuadra cu 1228 caso activo.
Parti preocupante ta cu tin 35 persona ya ta interna den hospital di cual 7 persona ta den ICU y si wak bon e capacidad di ICU ta yega na un limite di 12 y manera gobierno a mustra cu por aumenta esaki te na 33.
Tambe nos por a compronde cu por aumenta e cantidad di pashentnan di COVID cu por drumi riba afdeling special prepara, cu por tuma un total di 60 pashent.
Nos tin cu bisa cu tog e ta un situacion preocupante ya cu casonan ta sigui aumenta rond 71 caso pa dia.
Na dado momento nos a haya nos mes cu mas caso den hospital y esaki lo pone un presion hopi grandi riba personal di enfermeria, capacidad y tambe material cu ta necesario, cu sin duda lo tin un impacto hopi grandi riba e sector di cuido medico.
Ta hopi importante pa gobierno tin bon cla kico ta e medidanan cu tin cu wordo tuma pa di e forma aki por controla e malesa aki. Nos por a mira un brote tambe na Huize Maristella na unda nos grandinan ta hospeda, tambe otro brote na warda di polis na San Nicolas. Esaki ta ilustra con alarmante e situacion ta y ta caminda tin cu pone cabesnan hunto pa mira kico ta bay haci cu e situacion aki.
Na momento cu a habri frontera dia 10 di Juli, por a nota cu apesar cu tin personanan cu a drenta Aruba cu e malesa aki, tog no a tuma cierto medidanan loke a pone cu esunnan cu a bay den clubnan nocturno, a wordo contagia y asina e malesa aki a sigui wordo plama te cu el a yega den famia.
Si nos tene na consideracion cu 50% di contagionan ta sosode den famia, ya cu 25% ta sosode na trabou y otro 25% na sitionan no determina pero 50% den famia, ta duna un indicacion importante cu mester stop e contagio aki for di comienso pa esaki no drenta den seno familiar.
Sigur ora cu aki na Aruba nos ta hendenan di famia, caminda apesar cu nos conoce cu hopi hende rond di nos ta tuma tur precaucion, caminda nan no ta bishita otro, nan no ta bay cerca otro, y tin contacto via di yamada di telefon of on line, tog por mira cu e contagio ta halto den seno familiar.
Ta hopi importante pa gobierno na luga di bin tur anochi na tv durante e conferencianan di prensa, presenta otro formanan di prevencion. Enbes cu Prome Minister ta bin dilanti y motiva nos hendenan e ta bin ta zundra por ehempel hobennan, bisandonan cu nan mes ta bay caya topa cu e malesa. E mester bin cu otro formanan pa acerca nos hendenan pa asina motivanan pa cumpli cu reglanan y rekisitonan cu tin pa loke ta proteccion y pa tur hende ta safe cu bo mes pero tambe cu comunidad.
Sinembargo e reaccion di Prome Minister riba e sugerencia aki ta cu el a tum’e na malo y a argumenta cu e ta mama y pesey e ta reacciona asina. Segun Wyatt-Ras e minister aki no solamente tin cu mira cu e ta mama sino cu e tin e rol di represanta nos pais y su persona ta esun cu mester duna ehempel na tur hende.
Nos tin profesionalnan hopi adecua cu ta haciendo e trabou y ta bon pa gobierno laga e profesionalnan aki bin padilanti pa duna informacion. Paso gobierno hopi biaha ta papia di no kier mescla politica den asunto di COVID, pero di otro banda continuamente ta gobierno ta “in the picture” mientras cu ta profesionalnan mester ta esunnan dilanti pa duna informacion na pueblo.
Consecuencian di COVID ta hopi grandi tambe pa enseñansa manera por ehempel scolnan lo habri dia 3 di september y por mira preparacion tumando luga pero tin hopi maestro cu tin preocupacionnan grandi, entre otro cu e salanan no ta adecua, entre otro cu no tin wc adecuado, e falta di un situacion hygienico manera ta rekeri y tampoco tin materialnan adecuado.
Pero kico nos a mira di e Minister di Enseñansa. Na luga di asumi su responsabilidad el a practicamente laba man di tur su responsabilidad y bisa cu tur scol mes ta dicidi loke nan lo haci. Con pa habri y ki dia nan ta habri.
Aki por mira cu na luga cu gobierno asumi un rol mas pro-activo den yuda e scolnan, scucha nan kehonan y wak con por yuda nan pa nan por inicia e aña escolar nobo na un forma adecuado, e ta djis tira esaki bek riba e scolnan.
Otro punto ta e decision di ‘mondkapjes’ pa scolnan caminda WHO ta recomenda cu na momento cu tin situacion di contagio cu ta wordo sospecha, muchanan di basisschool tambe por usa mondkapjes. Aunke cu Wyatt-Ras a haci pregunta al respecto gobierno no a tuma esaki na serio.
Mester tene esaki den consideracion ya cu no solamente ta proteha e muchanan pero ta un proteccion tambe pa e maestronan cu si na dado caso mayan maestronan bira malo y cay afo, lo no tin scol tampoco.
Pues aki tin cu percura pa proteha ambos grupo na scolnan rond Aruba.
Fuera di esakinan tambe tin e aspectonan psycho-sociaal cu sin duda Wyatt-Ras ta haya hopi importante. Esaki ya cu tin hopi hende dor cu nan no por move, cu nan no por bishita otro hende pa socialisa, nan ta cay den situacionnan di stress, ta cay den depresion y esaki por conduci na otro tipo di problemanan mas pio.
Ademas casonan di maltrato y abuso ta aumentando den e periodo aki y riba e particularidad aki, no por tende kico gobierno ta haciendo pa atende e aspecto aki. Tin cu senjala cu ta siman pasa gobierno a core bin Parlamento pa duna informacion ya cu ta for di 13 di Maart nos no a tende di e Minister mas y ta solamente na television por mira su presencia caminda e ta elogia su mes y su gobierno manera con e casonan a baha y ta ora cu tin casonan positivo e ta bin dilanti como vocero y anuncia esakinan.
Siman pasa ora cu fraccion di AVP pa falta di tin suficiente informacion nos a dicidi di acerca diferente profesional pa duna un presentacion durante un “Brainstormsession” pa duna nan pensamentonan, duna datonan concreto y no politikeria, informacion relaciona cu e malesa aki na nos partido, e minister encarga cu Salubridad a sinti su mes ofendi.
Como reaccion riba e inicativa positivo aki di partido AVP e Minister a bay den publicidad bisando cu politica ta penetrando den e lucha contra COVID. Ela purba boycot e actividad dor di yama un reunion informativo den Parlamento. Pero realidad di e caso aki ta cu gobierno ni e minister concerni ta duna Parlamento informacion ni ta consulta cu parlamento pa haya alternativanan. Mientrastanto a tuma decision pa un toque decqueda y a cambia esaki dor di falta di comunicacion entre gobierni y OM. Ta lamentable cu gobierno no ta transparente ni ta tuma medida mientras casonan ta sigui subi sin control.
