“For di momento cu bo aparato hudicial ta distancia di bo decisionnan of nenga di cumpli cu bo instruccionnan, ta momento pa bo mes saca bo mesun conclusion”, asina Robert Candelaria, miembro di fraccion di AVP den Parlamento a vocifera awe. E ex Altoinspector di Polis ta lamenta di mira con, deliberadamente, gobierno ta atachando e imagen di husticia di nos pais. E situacion a alcansa un nivel asina abou, cu awor henter e sistema hudicial a cuminsa bira lomba pa nan hefe. “Ta algo nunca bisto”, segun e parlamentario.

Esaki ta sosode solamente ora cu politica kier opera den e area hudicial, sin tene cuenta cu ta e Procurador General tin e ultimo palabra. E ta referi na e decision cu Ministernan Evelyn Wever y Andin Bikker a anuncia diaranson anochi, cu ta reintroduci “Toque de Queda” (avondklok) desde diabierna marduga entre 12:00am pa 5:00am. A detene 8 persona riba e prome dia caba, duna nan multa y laga nan bay. 

Riba e mesun diabierna anochi, ta sali un comunicado interno di Polis cu ta instrui henter Cuerpo Policial pa nan no detene ningun hende mas pa motibo di Toque de Queda. Un instruccion straño, pasobra ta e Altocomisario interino a anuncia e decision durante un conferencia di prensa, para band’i Minister Presidente. Ta parce cu no a consulta cu Ministerio Publico ora a tuma e decision den
Crisisteam y Fiscal a dicidi cu lo no persigui ningun hende pa Toque de Queda.

Ministerio Publico a menciona cu e cicunstancianan no ta duna motibo, na e momento aki, pa bin cu un semehante medida den ley, esta pa forsa ciudadanonan pa no sali for di nan cas durante algun ora di dia. Mientras cu mainta a bisa esey, atardi ata Procurador General interino ta cambia di opinion y ta bisa cu awo si tin motibo y como tal lo continua cu e Toque de Queda. Un berdadero maneho “flip flop” cu ta parce un wega en bes di un asunto serio! “Nos ta puntra nos mes ora cu casonan bini dilanti di hues, con Ministerio Publico lo mester defende esaki, mirando cu ta gobierno mes ta dudando informacion conflictivo”.

“E desaroyo aki ta subraya locual mas biaha mi a yega di trece pa dilanti caba: E gobierno aki ta traha sin maneho, sin vision y awo sin autoridad tambe”, di acuerdo cu parlamentario Robert Candelaria. “Na momento cu husticia deliberadamente keda sin sigui bo instruccionnan y publicamente bisa bo cu bo no tabatin e autoridad pa tuma tal decision tampoco, ta momento pa saca bo conclusion”. Dicon no a tuma e tempo necesario y palabra cu tur partner den e cadena hudicial prome cu tuma un desicion y despues keda cambia esaki, creando confusion innecesario?

“E cos aki ta un berguensa grandi pa Evelyn Wever y Andin Bikker. Den tempo di crisis, gobierno mester ta creando trankilidad y claridad. Pero loke gobierno ta haciendo ta pone cu nan a perde autoridad y legitimidad. Realisa cu boso maneho descabeya ta yegando su final mas lihe cu boso mes ta kere”, asina Robert Candelaria a termina bisando.