Dia 18 di augustus fraccion di AVP a entrega un carta y dspues un rapel dia 21 di augustus, cualnan a wordo dirigi na Presidente di Parlamento, den cual fraccion di AVP ta pidi un reunion cu diferente actor riba tereno medico, Parlamentario Mervin Wyatt Ras a trece dilanti.
“Na mes momento nos a pidi presencia di diferente specialista y terapista den e reunion aki pa asina nos por papia di e Landsbesluit di BIG”. Dia 14 di augustus Parlamento a caba di ricibi esaki, cu ta un continuacion di e ley di BIG, cu nos a pasa na aña 2014 y cu a drenta na vigor na aña 2017 bou gobernacion di AVP. E tempo ey bou encargo di Minister Alex Schwengle. A cuminsa cu e proceso pa asina bin cu diferente Landsbesluit cu ta mara na e ley aki.
E actual gobierno, na aña 2018 a lanta un comision pa traha riba e diferente recomendacionnan pa e Landsbesluit aki por a bira realidad. Den e ley di BIG, cu ta Beroepen in de Gezondheidszorg, tin diferente regla pa asina registra personanan cu studia medicina, of ta bira terapista, pa asina nan por traha aki na Aruba.
A base di e ley di BIG di 2014 a keda regla diferente sistema di acreditacion, caminda e tempo ey a scoge pa esun Hulandes, esta e BIG y esun Canades.
Sinembargo e actual gobierno kier a bin cu otro sistemanan di acreditacion tambe pa acomoda studiantenan cu ta studia medicina den paisnan den region y nan a agrega e sistemanan di Costa Rica cu ta wordo yama SINAES, cu ta e ‘Sistema Nacional de la Educacion Superior de Costa Rica’ y tambe esun di Colombia cu ta CNA cu ta ‘Conseho Nacional de Acreditacion.’
Nan a pensa tambe di haci uso di e sistema Mericano. Na aña 2019 den un reunion di Parlamento nos a discuti e asunto aki ya cu na dado momento den e comision encarga cu implementacion di BIG no tabata di acuerdo cu e diferente profesionalnan medico y no por a yega na un consensus.
Pa tal motibo Parlamento a dicidi cu Minister lo mester bay sinta na mesa cu e diferente ‘stakeholders’ pa asina yega na un miho forma pa atende cu e asunto aki.
Fraccion di AVP no sa kico a sosode despues y awor nos ta haya nos mes confronta c’un LB-ham, fecha dia 11 di augustus 2020, cu a drenta Parlamento dia 14 di augustus 2020, caminda nos tin dos siman pa nos por duna un opinion relaciona cu e Landsbesluit aki. Ta di lamenta cu no a yama reunion al respecto.
Esaki ta duna e impresion cu e Landsbesluit aki lo wordo pasa manera un ‘fastball’ y nos ta kere cu siguramente tin cu scucha opinion di esunnan cu tin cu bay traha cu e ley aki.
Hunto cu e Landsbesluit aki tambe nos a mira e conseho di Raad van Advies, den cual nan ta duna di conoce cu nan ta preocupa pa e hecho cu no tin un ‘Instituto di Calidad,’ paso esey tabata e condicion.
Nos a pasa un ley na aña 2014 cu ta yama Landsverordening Kwaliteit van de gezondheidszorg’. Den e ley aki ta stipula den articulo 16. cu mester a lanta un Instituto di Calidad pa atende cu e.o. evaluacion di registracion. E Instituto di Calidad aki mester atende cu e proceduranan, tratadonan y lo coordina evaluacion di registracion di profesionalnan den cuido.
Si e Instituto di Calidad aki no a wordo lanta, esaki lo nifica cu tin e peliger na e momentonan aki cu evaluacion di registracion mo lo bai den forma objetivo.
Wyatt-Ras no ta spera cu esaki lo ta e caso y ta importante cu mester bin claridad y cu mester lanta e instituto aki.
Raad van Advies ta cuestiona e motivacion di gobienro pa reconoce e studiantenan cu a studia den nos region. Gobierno ta splica cu dor di escasez di specialistanan medico mester reconoce esnan studia den region. Sinembargo esnan cu caba e estudio di medicina den region ta caba como basisarts y nan mester sigui studia pa specialisa nan mes como huisarts of un otro tipo di specialismo. Esey lo nofica si bai over na reconoce tur e docternan studia den region nan no lo por traha tog como specialista of huisarts.
Di otro banda gobierno ta motiva e reconocimento di dokternan studia den region tambe usando e argumento cu esaki ta un speerpunt di e acuerdo di gobernacion. Aki Raad van Avies kier haya sa cual ta e motovacion real pa reconoce esnan studia den region.
Tur esakinan ta puntonan cu mester bin dilanti y mester haya informacion prome cu e LB bai na vigor.
Wyatt-Ras ta señala cu den pasado ora cu Landsbesluitnan tabata drenta Parlamento y nan mester a drumi dos siman na parlamento prome cu nan wordo ehecuta, e tempo ey su persona como Presidente di Parlamento, tabata yama un CC pa trata e LB, mientras cu awor esaki no ta sosode ni si haci peticion pa esaki.
Esaki ta mustra con gobierno kier pusha decisionnan sin tranparencia. Ta di spera cu un reunion lo ser yama cu stakeholders pa nan por trece nan puntonan di preocupacion padilanti, parlamentario, drs. Mervin Wyatt-Ras a declara.
