E preocupacion ta grandi den comunidad relaciona cu e ultimo desaroyonan rond di e virus, COVID 19. Miembro di fraccion di AVP, drs Mervin Wyatt Ras, a gradici tur esnan cu a participa den e “brainstorm”-Sessie encuanto di COVID 19 cu a wordo organisa dor di Organisacion di AVP diahuebs dia 20 di Augustus ultimo. Hopi informacion valioso a bin padilanti durante e evento.
Parlamentario Wyatt-Ras a señala e importancia di e tipo di evento aki durante cual ta comparti informacion dor di cual partido por prepara su mes pa duna un aporte constructivo na e discucionnan rond di COVID 19 y decisionnan cu mester ser tuma.
“Sin duda e “brainstorm”-sessie organisa pa AVP tabatin un acogida hopi grandi. Teniendo na cuenta “social distancing” y otro indicacionnan manera uso di mondkapje y uso di handsanitizer, un total di 16 profesional den 2 sesion a hiba palabra encuanto diferente aspecto di e malesa COVID, cu ta un malesa devastador pa nos comunidad y pa mundo henter.
Na e momentonan aki Aruba tin mas cu 1534 caso y esakinan ta sigui crece y tur hende ta preocupa dor cu den casi tur famia tin un famia of un conoci cu a bira victima di e malesa aki.
Wyatt-Ras ta haci uso di e oportunidad pa gradici tur e profesionalnan, tanto riba tereno medico como tereno psy-social, e tereno sikiatrico pero tambe enseñansa y e parti di airport kendenan a bin padilanti y duna nan aporte.
Specificamente Wyatt-Ras kier gradici e ‘outbreak management team di Hospital, VMSA, ASHA, tambe na dokter Posner, dokter Schwengle, dokter Anaya, dokter Kock y dokter Hermans.
Alabes tin palabra di gratitid pa drs.Staring di departamento di Salubridad cu via zoom a duna informacion relevante. Pa e parti di enfermeria a conta cu presentacion di ODEA, sra. Sharlin Farro y ta gradici’e pa esaki. Pa parti di botica nos tabatin sra Sharon Arends Bareño, kende a duna un splicacion cla riba tipo di medicinan, uso di e medicinanan aki caminda a menciona cu uso di paracetamol a subi, mescos cu vitamina C. Danki na dje y
dokter van Galen y sr. Sneek pa nan presentacion tocante e parti psycho-sociaal sikiatrico. Tin cu tene cuenta cu aumento di depresion bou di nos hendenan y sigur tambe nos mucha- y hobennan kendenan ta haya falta di tin contactonan social, cu nan amigonan ora cu nan no ta bayendo scol.
SIMAR tambe ta haya palabra di gradicimento pa a duna informacion relaciona cu enseñansa, cual pronto lo tin su apertura pa un aña escolar nobo, sinembargo na mes momento el a señala cu tin diferente aspecto material como di infrastructura cu mester haya un areglo pa esakinan, caminda esaki lo mester ta un forma gefaseerd.
Finalmente danki na sr. Croes encarga cu testnan na airport cu a duna un bon presentacion riba e parti aki.
Wyatt-Ras ta gradici tambe colega Robert Candelaria pa su sosten na e organisacion di e evento aki, sr Benny Sevinger, sr Mike Eman pa su vision y tambe colega di partido sra. Gerlien Croes cu como un persona cu tabatin COVID a haci pregunta basa riba su experencia.
Wyatt-Ras ta trece padilanti cu no ta pasobra bo ta un partido politico, bo no por pone atencion riba aspectonan importante den nos pais y cu bo por a haya diferente profesional pa por pensa conhuntamente y duna idea con pa anda cu problemanan den nos pais. Wyatt-Ras kier gradici un biaha mas di curason na esnan cu a mira nan profesionalismo na prome luga y no aspectonan politico y a acudi na e sesionnan.
Wyatt-Ras kier a reacciona riba sr. Rocco Tjong di partido Mep cu a reacciona riba e evento di AVP den forma negativo y kier haci como sifuera ta informacion di pashentnan ta wordo duna.
Wyatt-Ras no a spera esaki di Rocco Tjon, kende promer cu el a drenta politica tabata un profesional. Y e sa tambe cu un profesional por duna informacion nan tur cu ta interesa, esaki den interes general di comunidad. En especial pa profesionalnan den Salubridad privacidad di pashent ta di importancia.
Awor diripente kier tira culpa di lekmento di informacion ariba AVP y e brainstorm-sessie.
Pa nos partido ta di sumo importancia cu nos por duna un aporte constructivo pa locual ta pasando na pais Aruba y ora cu nos no ta haya e informacion aki den Parlamento, nos tin cu busca esaki otro caminda ya cu esey ta den bienestar di nos hendenan y AVP lo keda sali na bienestar di nos hendenan. E hecho cu a brainstorm cu profesionalnan den cuido ta duna e garantia cu interes y privacidad di pashent ta central. Mester stop di tira lodo riba hende dor di fraccion di MEP. Parlamentario drs Mervin Wyatt Ras a declara.
