Diahuebs mainta a tuma luga e conferencia di prensa semanal di partido AVP, e biaha aki dilanti Cas di Partido. A hiba palabra parlamentario ing. Mike de Meza cu a elabora riba e crisis en general cu ta tumando luga den gabinete Wever Croes. Entre mas tempo pasa, mas crisis ta bin acerca y cu un gobierno cu no tin ningun forma di purba controla crisis. A constata cu prome cu crisis di Covid-19 a haci su entrada cu e gabinete aki tabata tin economia totalmente tranca. Sin plan y sin sa en lo absoluto kico pa haci.
Ta depende riba progreso, oportunidadnan pa cu refineria lo brinda, biniendo di promesanan di campaña cu lo haci tur lo posibel, for di e fila di inversionistanan cla cu na momento cu MEP drenta gobierno lo ta dispuesto na inverti den e refineria. Un ENGAÑO! Como minister encarga cu energia, por a mira cu no tabata su plan pa tene e refineria habri, mas bien despues di mas di un aña a sinta porfin pero pa defini riba cierre di e refineria cu consecuencia cu a manda hende cas. Su malintencion pa termina contract bou conseho legal di bufete di su propio tata. Na final e prome minister a exonera e refineria cu 320 miyon florin bou di e compromiso cu lo cera e refineria na Aruba.
Ningun di e companianan cu a manda proposicion ta operador mundialmente renombra
Mike de Meza a remarca cu, completamente diferente na partido AVP, cu si a haci tur esfuerso, cu a pone mas di 100 operadornan renombra riba mesa pa yega na un posibel reapertura, cu locual a compronde awo ta cu RDA a habri e request for proposals di un poco mas cu 50 compania cu a manda algun informacion aden y for di akinan 29 a cualifica. De Meza (Parlamento) a bay informa y a descubri cu ningun di e companianan aki ta Tiar1 companies, companianan renombra mundialmente cu realmente ta den e industria di refineria. Un lastima.
Ta netamente e resultado ora bo haci oferta riba vraag en aanbod
Un prueba cu e gobierno aki no tin e capacidad ni habilidad di busca operadonan nobo. Ta trata di intermediarionan cu ta buscando un manera pa bende e refineria nan mes y ta laga pasa cu nan ta interesa den dje. Tur esaki pa falta di experticio den e materia. Operacion di un refineria ta riba cifranan di 1 Biyon dollar mientras ta papia cu companianan (brokers) cu tin entradanan di algun 100 mil dollar cu no ta cay ni den consideracion pa revamp of haci mantecion grandi cu gastonan riba 1 biyon dollar. Operacion di un refineria tin un presupuesto di gasto di riba 10 Biyon pero a sinta na mesa cu brokers, anto bo no por ta serio, ta locual Mike de Meza a bisa.
Porta ta esaki mes ta e intencion di e gobierno aki, mirando cu nunca tabata tin e interes pa habri e refineria for di prome instante. Tur e engaño di ora cero, engaño riba e lista largo di inversionista tur esaki ta gañamento na e pueblo. Tur locual cu Wever-Croes y su grupito ta interesa riba dje ta pa pone man riba e terminal caminda nan ta mira cu tin placa pa bay traha.
