Lider di fraccion di AVP, sr Marlon Sneek dialuna nochi caba a protesta contra un reunion cu a wordo yama pa Presidente di Parlamento pa un bijeenkomst diamars mainta, caminda Prome Minister lo bin contesta preguntanan relaciona cu casonan di corupcion den su gabinete.
“Nos a bin awe diamars aki pa e reunion pero pa protesta na mesun momento con por ta posibel cu ta yama un reunion a sabiendas cu Minister Marisol Lopez Tromp kende a trece e bagamunderianan cu ta pasando den e gobierno aki dilanti, no ta na Aruba.
A core yama un bijeenkomst pa purba di laga Prome Minister bin hunga un show den Parlamento pa purba di contesta of contra-aresta e puntonan cu a wordo treci dilanti dor di Minister Lopez Tromp.
Nos a protesta for di momento cu nos a ricibi e invitacion dialuna anochi, nos a bisa nan cu esaki no ta aceptabel ya cu ta imposibel c’un Minister ta trece su disertacion dilanti y a bisa nos cu den e segunda tanda e n mas pa bay core.
Sigur den e otro cura, e cura geel ya cu eyden tambe di un par di cabrito cu mester wordo capa y anto awor kier cora yama un reunion den forma di un bijeenkomst pa wak con ta haci damage control.
Fracciobn di AVP ta contento cu despues cu nos a protesta dialuna anochi, diamar mainta ora cu nos a yega pa e reunion, nos a wordo informa cu e reunion a wordo cancela, sin haya carta, sin sa e motibo of si ta e Prome Minister a bolbe bira malo pa cancela e reunion aki.
Nos ta kere cu e reunion aki no por wordo yama mas tampoco ya cu mester warda e Minister di Infrastructura bin bek Aruba anto e ora nos por sigui cu e reunion cu e segunda tanda caminda nos lo por scucha tur cos y pa nos por cuestiona tambe.
Tur hende por a mira cu fraccion di AVP a warda e primera tanda pa haya un idea di e motibo di con kier a manda e Minister aki cas y nos a bin mira cu ta cos di sconde tin.
Nos por a scucha diabierna ultimo pa medio di Minister Marisol, ta c’un cantidad di cos robes tin ta tumando luga.
E Minister di Husticia cu ta e Minister cu mester firma tur ley, cu ta e Minister cu mester percura pa salvaguardia pa cada ley haya nan contenido, nos ta mira cu e Minister aki ta den bagamunderia.
E ta bezig ta fix un warda di polis fantasma, e ta bezig cu trailernan pa fix cos pa amigonan, pues bagamunderia den dia cla.
No ta esey so, corda cu hopi di e tipo di bagamunderianan aki AVP a trece dilanti caminda nos a papia bon cla di e helicopter-gate, ya cu eynan tamb tin cosnan robes a tuma luga bou e watch di Minister di Husticia.
Nos por a scucha Prome Minister bisa cu gobierno ta stanca y nos ta kere cu su persona sa bon bon unda oficina di Gobernador ta situa, eynan e mester bay pa entrega retiro di su gabinete ya cuno por ta posibel cu ta gobernando e pais aki cu tur e bagamunderianan aki.
Tin un expresion cu ta bisa cu ‘or cabaron bisa cu e lodo a hole stinki, kere ya cu ta eyden e ta biba’ y awe for di paden nos ta scucha cu tin bagamunderianan den dia cla tumando luga.
Esey pa nos ta inaceptabel y a inaceptabel cu den e comunidad aki tin famianan cu no por pone pan riba mesa, anto tin Ministernan cu ta bezig a fix cos, haci cosnan di bagamunderia cu placa di pueblo.
Esaki no ta aceptabel y e unico reunion publico cu mester bin ta pa manda e gobierno aki cas den su totalidad pero nos ta contento pa mira cu despues cu nos a protesta, a dicidi di para e reunion diamars mainta.
