Diamars mainta durante conferencia di prensa semanal di partido AVP Robert Candelaria un biaha mas a enfatisa e situacion di crisis financiero y social cu nos pais ta aden pero ta parce di ta algo irelevante pa e Gobernante actual. No ta di awo cu tur hende sa cu Hulanda kier tuma over husticia di pais Aruba pero for di hopi aña caba, pero ta parce cu Minister Bikker ta hasi’e mas fasil pa nan haya rason pa tume over.

Den e situacion delicado cu nos pais ta aden cu Hulanda y tambe e retonan financiero, keto bay desicionnan robes y ilogico ta wordo tuma di parti di Minister Andin Bikker den husticia. No solamente containernan bieuw y den mal condicion, pero cumpra y poni na Huis van Bewaring na Dakota y un sin fin di desicionann relaciona cu esaki cu no tin splicacion logico nan tras.

Robert Candelaria ta trece dilanti cu si tene cuenta cu, ora financieramente pais ta pasa den retonan cu nunca antes a conoce, e Minister ta tuma desicion pa cumpra set di container bieuw y pone nan riba tereno di Huis van Bewaring pa cera ilegalnan pa deportanan sabiendo cu keto bay frontera cu e paisnan aki manera Venezuela y Colombia ta cera.

Gobierno su prioridadnan no ta cuadra cu realidad

Por a mira un prome Minister ta sali di un banda ta bringa pa keda den contacto y den deliberacion cu Hulanda y di otro banda un Minister di Husticia cu ta bay cuminsa cu un “test case” contra Hulanda.

Esaki no ta momento pa tipo di desicionnan contradictorio asina den un gobierno cu tur su consecuencianan pa entre otro nos husticia. Un Cuerpo Policial sumamente demotiva, KIA cu un tension enorme, Brandweer faltando material necesario pa funciona optimalmente y den algun situacion te asta trece nan bida den peliger, mientrastanto e Minister ta papia di su test case y ta hinca fondonan Hulandes den cumpramento di container. Ta comprendibel cu Hulanda ta prefera di utilisa nan fondonan nan mes den nos husticia. Esaki nunca por ta e caso, pero e maneho di e minister ta parse un invitacion pa Hulanda interveni den nos husticia. 

Un Minister pragmatico cu semper a proclama di tin solucion pa tur cos y cu su predecesor no a haci. Awo cu oportunidad a presenta pa demostra ki solucion pragmatico e tin pa husticia, e ta papia riba locual el a hereda, situacion sin presedencia y otro dichonan di dje. E minister aki ta lubida cu pronto e tin cu bay laga legado atras pa e siguiente Minister.

Kico ta locual e siguiente Minister lo bay hereda di Andin Bikker?

Un Cuerpo Policial completamente kibra, un KIA y un Brandweer cu masha hopi reto, un Guarda nos Costa den situacion incontrolabel y asina por sigui menciona.

Unda destaho publico riba containernan a keda ?

Robert Candelaria ta cuestiona e destaho publico cu te dia di awe no ta sigur si a tuma luga si of no pa bin cu container, con e procedura tabata of por papia di un onderhandse deal of “fix” bou man ? Si acaso esaki a tuma luga, na ken a otorg’e y cuanto placa a bay den e proyecto di container aki y mas importante kico ta e prioridad den maneho pa cu esaki? E Minister en cuestion a bisa di tin solucionnan pragmatico manera enkelbanden pero awor e no ta bezig cu implementacion di esaki. Awor Aruba ta den un situacion di crisis y pais Aruba no tin placa pa cosnan importante, ta hasi escoho pa hinca placa pa cuida un ilegal cu mester bay su pais bek. Candelaria ta sugeri pa duna e ilegalnan mas tanto cu ta posibel meldingsplicht, y bisti nan enkelband y bin cu solucionnan cu enberdad ta pragmatico mirando cu den e momentonan aki cada florin cu Gobierno tin, tin prioridadnan hopi mas importante cu cumpra y fix container biew / duna 3 cuminda pa dia na esnan indocumenta y paga pa bewaking. 

Prioridadnan mester ta riba un liña corecto

Locual cu ta continuo ta e prioridadnan robes di e Gobierno y di e Minister di Husticia, cu no ta na beneficio di nos pais ni ta na beneficio di nos husticia. E Minister aki ta keda wak patras riba locual supuestamente el a hereda, enbes di wak padilanti y bin cu soluccionnan cu na momento cu e baha for di e posicion aki ( cu talbes ta pronto ) e lo tin cu mustra cosnan concreto cu el la laga atras cu a adelanta husticia compara cu el a haye, mientras actualmente no ta mira ni un ehempel di esaki.

Robert Candelaria ta apunta e echo cu situacion na Huis van Bewaring na Dakota ta escalando cada biaha mas. Antes tabata tende cu un persona lo a huy for di e centro, mientras awo ta na cinco cinco nan ta scapa for di e luga. Kico ta e situacion riba seguridad di e trahadonan, siguridad di e Bario. E propio Minister den conferencia a menciona cu tin aproximadamente 20 persona mester sali for di KIA cu a comete crimennan grave pa bay nan pais bek. Esaki ta e tipo di hendenan cu mester bay sera den un instituto prome cu e bay su pais bek y no e hendenan cu a gara ta traha sin permiso. Naturalmente nan tampoco ta legal riba nos isla pero e prioridad mester tin no ta locual cu nos ta mira.

Maske ta na final di su periodo e por pone su prioridadnan na ordo y locual ta corecto mester bin prome, pasobra nos ta sumanete preocupa pa e maneho cu e ta hibando. No ta momento pa test case, pero mas bien bin cu seriedad dilanti y busca union den bo Gobierno ( aunke e ta bisto cu ta algo hopi limita ) y pone prioridadnan corecto dilanti.