Durante un conferencia di prensa di partido AVP Richard Arends a duna un splicacion detaya riba e structura y dinamica di e entidad di reforma cu ta riba mesa pa e islanan. E la haci un distincion entre e paketenen di reforma – cu ta discutible – y e manera con Hulanda ta propone pa e reformanan aki wordo ehecuta y te hasta forsa. Parlamentarionan ta fungi sin carga y consulta – zonder last en ruggespraak – pero e structura un funcionamento di e entidad aki ta mina e obligacion fundamental aki di un parlamentario.
Richard Arends tabata minister di Asuntonan Economico y consehero di Gabinetenan Mike Eman riba varios tereno. Den su declaracion ta enfoca cu obviamente ta kere den cooperacion di reino pero ta kere solamente si esaki ta consisti di un win-win opportunity pa e paisnan envolvi. Nos maneho economico tabata basa riba posicion di Aruba como brug entre Hulanda y region, pero e mester ta boluntatio y cu beneficio pa tur.
Si no coopera, ta stop tur ayudo
E condicion cu Hulanda a pone riba mesa ta pone e paisnan den un dilema entre beneficio financiero, manera e.o. loonsubsidie y sosten di likides riba termino cortico, versus maneho social-economico cu e paisnan mara na dje p’e proximo siete añanan. No solamente e gobierno actual, pero tambe e proximo dos gobiernonan siguiente. Si na final un solo pais dicidi cu entidad aki tin cu sigui, esey lo socode tambe. Si acaso pais Aruba, of paisnan Corsou of Sint Maarten, no coopera cu e entidad ta para tur tipo di asistencia y tur tipo di cooperacion.
Unda tur e entidad lo bay haya autoridad:
Arends a duna un ehempel caminda ta bay mas leeuw cu e landenpakket, entre otro den area di finansas publico, organisacion gubernamental, reformanan economico, salud, enseñansa, husticia, infrastructura caminda ta obliga Gobierno pa coopera cu esaki sin previo palabracion. Economia ta consisti di consumo publico y priva, exportacion, importacion pero tambe inversionnan.
E ultimo lo no ta posibel mas como cu Gobierno y lo no tin herment mas pa influencia crecemento economico cu inversionan publico. Arends a ilustra cu un ehempel di infrastructura unda cu Gobierno lo no por aloca capital pa hasi inversionan den careteranan y barionan. Si no cumpli cu esaki lo para tu clase di financiemento, lo blokia fiansanan, lo stop tur cooperacion y hiba un supervision financiero mas severo cu CAFT unda cu lo por bay asina leeuw di controla caha di Gobierno.
Na banda di tur esaki e entidad, como tambe ministernan hulandes individual, por pa duna Algemene Maatregel van Rijksbestuur (AMvRB) of instruccion via decreto real (KB) na Gobernador di Aruba pa forsa ehecucion di proyectonan y reformanan. Enbes di sirbi asuntonan di Reino, lo sirbi interesnan di Hulanda bou capa di Reino.
