Mientras enseñansa ta den decadencia, Minister Rudy Lampe ta sinta den reunion riba Rijkswet, sinta den Parlamento mientras e no ta parti di esaki, mas bien ta toca netamente na Minister di Algemene Zaken. E ta sinta eyden manera no tin niun problema/reto den enseñansa y si por a compronde bon un gran cantidad di cos ta pega na e momento aki na pais Aruba, ta locual Arthur Dowers a bisa.

Durante conferencia di prensa tambe a menciona cu tin varios scol den retonan grandi, manera entre otro na e scolnan publico. EPI cu hopi reto nan dilanti cu no sa ainda si ta pariba of pabou nan tin cu ubica nan mes, Prins Bernard school ( cu a duna tremendo resultado ultimo añanan ) cu a haya nan confronta cu engaño di e Prome Minister di continuidad di e facilidad mientras nan e elimin’e, Paso pa Futuro igualmente via un triki cu nan prome instante nan por keda, despues di intervencion di Minister cantidad di alumno a baha y nan tin cu kita nan for di scol. Asina ey a hunga wega cu hende, locual cu e Minister a haci, den futuro lo mira repercucion cu consecuencianan negativo pa enseñansa y bienestar di e maestronan.

Dowers tambe ta remarca riba e echo cu hopi di e docentenan aki no ta sinti nan mes sigur mas den nan trabou, cu ta disgusta, demotiva pa sigui duna e les cu e mesun cariño, aprecio y amor cu nan a duna pa hopi tempo y ta premira cu lo tin cu bin intervencion di un futuro minister/ gobierno pa trece bek e harmonia cu mester biba den enseñansa. 

Enseñansa ta netamente un di e camindanan cu kier mira harmonia, mirando cu ta trata di mucha den nan desaroyo. Maestronan ta hunga un di e rolnan di mas importante den bida di un mucha ( despues di mayornan ) nificando cu e posicion di e maestronan mester ta uno stabiel/ prepara y motiva pa e haci e trabou, cu lo bira un reto pa futuro.

Despues di un tirania di tres aña, sin sa cuanto mas lo dura cu Minister Lampe, pa bay bek y trece harmonia y trankilidad den enseñansa. Ta spera y anhela cu ainda lo tin hende cu e vocacion di bira maestro pasobra despues di e slechte beurt cu a haya na man di e minister aki por a demotiva hopi hende pa drenta e sector aki.

Pueblo y Parlamento mester ta consciente, cu na cuminsamento a pone hopi cla na e Minister en cuestion kico tabata e expectativa pa loke ta enseñansa, stipula via ley cu e tin cu duna splicacion y raporta na parlamento kico ta come y bebe den enseñansa mientras nada di esaki a tuma luga. E Minister aki a viola tur e principio / reglanan den maneho di enseñansa y den e momento aki nos ta den un situacion caminda tin un caos den e sistema di enseñansa y cu lamentablemente cu esnan cu ta bay sufri e consecuencia ta e muchanan cu ta drenta, esnan cu ta aden y esnan cu ta bay sali y sigui studia den e sistema di enseñansa.

Arthur Dowers ta spera cu maestro y sindicatonan keda lucha y denuncia pa asina parlamento haya sa kico ta sosode den e sector. Aunke ta mira cu nan ta demotiva/ demoralisa, asina mes nan ta hibando un lucha fuerte, un bay bin entre Minister Lampe y Minister President, pa denuncia y asina haya sa kico ta pasa den e sector pa hiba cu nan e lucha. No ta un lucha facil, ta desea nan un temporada di vacantie di trankilidad y pa nan sa cu nan ta un parti hopi importante den nos comunidad. 

Un danki pa e trabou incansabel cu nan a haci den e periodo dificil nos tras, deseando nan hopi forsa y animo pa e periodo nos dilanti y ta garantisa nan cu tin cambio, aunke e por tuma un tiki mas cu a spera, tin cambio den enseñansa y despues di e periodo aki cos lo bira miho den enseñansa.