Aruba ta pasando den un drama pa loke ta trata enseñansa den ultimo tres añanan y ta parce cu cada bes, ta bin un otro capitulo cu ta wordo biba y scirbi, segun miembro di fraccion di AVP, sr Arthur Dowers.
“Nos por a mira con e siman aki Minister di Enseñansa Rudy Lampe a sali y a zundra e sindicatonan y hasta a duna e impresion cu el a parti algun wanta den direccion di su gabinete y Minister Presidente, bisando entre otro cu Evelyn Weer Croes no tin nada di bisa su persona.
Lampe a pone enfasis den su mensahe pa Prome Minister cu den enseñansa ta su persona ta e homber, ta su persona ta manda y e carta cu Minister Presidente a manda pa sindicatonan, no tin balor.
Pa colmo minister Lampe ta echt kere cu tur hende ta bobo, cu ningun hende ta compronde kico ta pasando y e hecho cu el a informa sindicatonan cu e carta di Evelyn ta solamente un carta di comunicacion y nada mas, cu e carta aki no tin balor algun.
Lampe practicamente a bisa cu e carta aki ta un simpel pida papel sin importancia y sin nifacion cu hasta e por ta un accion politico.
Fuera di esaki Minister Lampe tambe a bisa cu e carta ta contene erornan humano ya cu Prome Minister a pone cu St Bernardschool ta keda manera cu e ta y cu esey no ta berdad.
Esaki ta algo cu fraccion di AVP a denuncia for di prome dia cu e carta aki a sali ya cu mi a haya straño cu dia e carta aki a sali y un dia despues mi ta den prensa bisando Simar y comunidad cu e carta aki no ta contene berdad, Minister Rudy Lampe ta keda keto, ta lagatur cos sigui, ta laga e momento di berdad yega y ora cu palo hala e hendenan, e ta bin bisa cu ta djis un carta di comunicacion y sin balor algun y ta trata di un fout humano.
Acaso no a mira y lesa e carta aki anteriormente hy ta lanta e pregunta con un gobierno por siguii tuma hende haci di e forma aki, con boso por sigui hunga un sentimento di maestronan, di mayor- y muchanan.
St Bernardschool ta un scol cu a duna hopi bon resultado pa e muchanan y ta hustamente duna e muchanan un posibilidad pa nan por bay mas dilanti y tin exito den nan educacion.
Lampe mes ta bisa cu e kier pa muchanan bay dilanti den enseñansa pero na mes momento ta kibrando un sistema cu ta yudando e muchanan di ta exitoso, pues algo ilogico.
Otro cos cu e meneer aki a haci, usando un triki den esaki, ta cu el a priminti e scol cu si nan tin cierto cantidad di mucha e ora e scol por sigui habri pero Lampe ta bira dor di su intervencion, el a percura pa e cantidad di mucha ta bira menos cu loke el a bisa e scol pa asina e por cera e scol.
E mentalidad aki e Minister di Enseñansa tin y e ta kere e tin rosea mas largo pero loke Rudy Lampe ta lubida ta cu su persona y su partido no tin e rosea mas largo e maestronan y e sindicatonan, y a cu nan lo bay tey hopi tempo despues cu Rudy Lampe y su partido RED desaparece.
Ta tristo si cu abo como partido y promesanan cu bo a haci y despues ta bira haci e barbaridadnan aki, contra maestronan, famia y e muchanan aki y Rudy Lampe ta lubida un biaha mas cu e por manipula bon, e por gaña bon pero e no tin curason pa e ser humano manera nos a spera di un persona cu ta ocupa un posicion como Minister di Enseñansa,” Parlamentario Arthur Dowers a declara.
