Segun sra Arends-Reyes ya tin un temporada basta largo cu tin intrankilidad constante den pueblo. E intrankilidad aki tawata existi caba prome cu e yegada di e virus di Covid-19, manera por ehempel den e mundo di Enseñansa. Diferente gruponan di maestronan a sali manifesta y protesta na varios ocasion, sea ta pa mas seguridad, pa Traimerdia, pa no corta den salario di maestronan drasticamente, no muda ni fuseer scolnan, pa no independisa scolnan publico pa menciona algun. Y toch bo ta haña cu na final di dia Minister president ta intermedia, duna e maestronan un poco palabra di aliento pa despues e Minister di Enseñansa, cu por cierto segun e Landsverordening Instelling Ministeries ta e unico encarga cu Enseñansa, na fin di manera ta draai su wil toch y no ta scucha di pueblo. Ta poco siman atras nos tawata na Skol Paso pa Futuro, a priminti nan cu nan no lo muda, nan a haña un carta cu ta skibi literalmente cu nan no lo muda y awo cu ta 5 pa 12 .. ta bisa nan cu alumnonan no mag di keda sinta voluntariamente kiermen cu nan ta den un problema serio atrobe pa motibo cu lo por baha bou di e cantidad cu Minister kier. Ata e scol, alumno y mayornan back na punto 0. Colegio San Nicolas a pidi pa su rector keda un aña mas, cual tawata posibel y pa trek in e MB, te awe nan ta wardando, management team ta wardando 1 augustus pa yega pa nan ta oficial, ‘geen haan die naar kraait’, Colegio Arubano tin un rector awo pero e preocupacionan di transparencia, te ainda no a wordo soluciona, mayornan a colecta riba mil firma, obispado a exihi, maestronan a manda varios carta pa gobierno y Parlamento y ningun invitacion a sali un dia pa scucha nan. ‘Tavez lo ta pensa ta fundacion nan mes regl’e?’ asina kier laga scolnan publico sigui cai bou fundacion. Prins Bernard school segun Minister no ta un scol dus e opcion lo ta inverti miyones di Enseñansa den K-12 cu lo bai afor, no pa trabou pa maestronan na Aruba, no pa drecha edificionan di scolnan. Kier inverti sumanan grandi den un proyecto y spera cu e algun shen studiante cu no tin documento legal ainda logra via distancia y despues haña financiamento di estudio pa bai studia na Merca segun e mandatario su pensamento ta. Netamente e cansancio aki di grita den desierto ta locual ta descurasha maestronan y pone nan den un situacion di inseguridad constantemente. Sigur un situacion hopi lamentable, parlamentarionan di coalicion a bisa bunita den media cu ta convivi y ta para tras di maestronan pero en realidad ta keda hasi diferente y ta sostene e Minister su decisionan pa asina no perde e yabi di gobernacion. Derechonan di mucha ta keda hopi leu di ta central. E situacion cada dia ta birando mas grave na Aruba pa motibo cu no ta negosha bon pa Aruba. Den sra Arends-Reyes su opinion orguyo ta un factor cu tin nos autonomia financiero na peliger. Danki na e reformanan grandi y necesario cu a hasi durante gobernacion di Gabinete Mike Eman, manera aumenta e edad di pensioen den fase cu sosten di gremionan, consolida y fondonan di pensioen cu awe Aruba tin buffer pa por a absorbe slanan cu a bin durante e pandemia aki. E ley di CAFT temporario y e entidad di CFT ta totalmente diferente di caracter di valides, una vez cu acepta e RFT den forma di CFT dificil pa un dia bai back y den concepto di Sra Arends-Reyes mester por lucha y negosha pa yega back den un siman na un entidad di Aruba cu e coalicion a modifica y Hulanda no a acepta. Ya cu Aruba no a haña schuldsanering pues lo ta inhusto pa obliga pa cai den e categoria mescos cu e otro islanan. Locual cu e recortenan cu ta anunciando den AZV ta wordo dicidi y imponi pa gobierno y cu lo tin consecuencianan devastador pa e salud di nos comunidad. E ensencia di un aseguro general ta wordo modifica di tal forma y locual ta cobrando e patiëntnan mester wak bon con hopi e recortenan aki lo yuda di berdad. Ki mishi un persona di edad avansa no por yega na un protese facil? Hobenan y adultonan lo mester bai cubri gastonan di cuido dental y esaki ta bin ta pasando algun tempo caba pa motibo cu no ta tumando garantieverklaring of ta yama patiënt pa paga door cu AZV no a cubri su tratamento. Basicamente e asociacion di dentista a pone Parlamento na altura por medio di entre otro un carta nan ta splica cu nan lo por bai atras cu 50% di nan entrada y tambe cu nan no a wordo involucra den e desicionan unilateral aki. E consecuencianan emocional, social y otro efectonan secundario riba salud di nan patiëntnan ta algun punto cu nan ta premira cu e decisionan aki tin y sin sa con hopi en realidad lo salba AZV door di a kita tur e coberturanan aki. Sra Arends-Reyes por ultimo kier a invita pueblo pa no obstante e temponan cu nos ta pasando aden, no descurasha y continua vocifera locual cu no ta bayendo bon, mescos ta e disgusto y repudio grandi cu tin na Aruba pa e castigonan pa abusonan contra menor cu no ta wordo castiga mas aña siendo ya e tawata 16 aña maximo cu den tempo di gobernacion di AVP a pasa den Parlamento huntu cu e peticion pa no laga denuncia di delitonan contra menor caduca. E codigo penal siman pasa a ser ahusta pa Aruba bai di 16 aña maximo pa 24 aña. Ban uni y duna sosten na e victimanan cu mester biba cu e realidad cu na Aruba te ainda e sistema ta fayando apesar cu ley ta duna espacio pa castigo halto. Prevencion ta esencial y mester pone leynan existente den practica y den caso cu victimanan papia, kere nan y sostene nan pa por trece husticia pa nan sra Arends-Reyes ta trece dilanti.