Asamblea General di Nacionnan Uni a declara awe 27 di juni como Dia Mundial di Empresa Micro, Mediano y Chikito. “E empresanan mediano y chikito, inversionistanan local y trahadonan independiente ta e weso di lomba di nos economia”, asina Parlamentario mr. drs. Richard Arends di fraccion di AVP a bisa. “Awe mas cu nunca e sector aki mester di tur e alivio financiero y sosten economico necesario pa bin bek y keda riba pia, como cu ta esunnan mas afecta pa e crisis ocasiona pa e medidanan implementa pa combati COVID-19.”
“Como Gobierno bo tin e tarea y responsabilidad pa brinda oportunidad, percura pa un competencia husto y hiba un maneho coherente. A frena capitalisacion di sector priva riba oportunidadnan economico door di aumento di impuesto bou capa di reforma fiscal, ausencia di un vision economico y falta di dialogo” asina e Parlamentario a bisa. “Economia ta un materia hopi sensitivo y ta rekeri esfuersonan dedica pa diversifica y brinda oportunidad”.
Motibo pakico Nacionnan Uni ta para keto riba e dia aki ta pa hustamente conscientisa mundo henter riba e contribucion di empresanan micro, mediano y chikito y trahadonan independiente na desaroyo sostenibel y economia mundial. Parlamentario Arends a indica cu como gobernante bo ta obliga di brinda confiansa, stabilidad y perspectiva. Ademas e ta boga pa un maneho dedica na tipo di empresanan aki.
“Despues di sosten financiero mester sigui cu sosten economico pa empresanan cu a wanta cabes riba awa, pero tambe pa esunnan cu lo no cuminsa draai di biaha ora cu nos frontera habri,” el a splica. A termina bisando cu un economia saludabel no solamente ta fiha e cuadro financiero di gobierno, pero tambe ta duna e base pa nos calidad di biba, enseñansa y salubridad, nos siguridad y e retonan riba tereno social.
Tempo Richard Arends tabata Minister di Asuntonan Economico y Comunicacion, su maneho tabata dirigi na aumenta acceso na capital y conocemento, coordinacion di procesonan ora di establece negoshi y pone e instrumentonan na nan luga pa haci e transicion pa un economia nobo di innovacion y digitalisacion. Durante e periodo cu e tabata Minister, Qredits a establece su mes na Aruba, a organisa ‘Small Business Event’ y Hackathon, tur den cuadro di promove mas negoshi y den desaroya nos economia.
