Medidanan di AZV cu a ser anuncia lo touch nos hendenan hopi profundo paso ta medidanan ora nos hendenan ta den un situacion di malesa y ta vulnerabel. Mervin Wyatt-Ras ta kere cu ta hopi importante pa nos para keto na dje y ta desaproba esaki. E minister a anuncia cu ora nos pashentnan wordo manda afo lo corta 50% den locual cu nan ta haya como daggeldvergoeding y tambe nan acompanjantenan no lo haya daggeldvergoeding y tambe nan lo mester paga 300 florin riba nan pasashi si nan bai companja nan ser keri. Wyatt-Ras ta kere cu netamente esnan humilde den nos comunidad lo sinti e efecto di esaki. Ademas lo introduci un eigen bijdrage. Ainda no a stipula cuanto esaki ta of no a informa pueblo cuanto e bijdrage aki lo ta ora di bishita dokter. Tambe ta corta den nos hendenan y ta haci comosifuera ta gobierno anterior a bin cu e medida aki. Pero esaki tur hende sa cu e gobierno aki ta bin cun’e pa cumpli cu locual nan a priminti Hulanda pa locual nan a bai di acuerdo cu Hulanda pa corta den nos salubridad, corta den nos hendenan. Tambe pa loke ta trata nos pashentnan cu ta tuma dyalise. E pashentnan aki lo no haya e transporte mas paga manera tabata e caso pero nan mes mester bai paga nan propio transporte. Ta netamente pa esan cu tin malesa chronico ta haci uso di e servicio aki. Tur esakinan ta medidanan ariba lomba di nos hendenan cu tin malesa chronico, manera personanan cu mester di tuma dyalise. Tur esakinan ta medidanan ariba nos hendenan. 
Manera minister a indica e zorgverleners tambe lo bai corta den nan entradanan sinembargo Wyatt-Ras ta opina cu mester wak unda tin mas vet pa corta. Den AZV mes por wak unda por baha su gastonan di operacion pero den gobierno tambe. Paso gobierno ta bin cu yen di medida den tur diferente sector sinembargo den gobierno mes ta keda cu tur su coordinadornan, tur e gastonan halto di gobierno. Gobierno pues no ta corta den su mes un gastonan sinembargo ta corta den nos pober hendenan cu ya caba tin necesidad di dje. Na momento cu bo mester di cuido medico e ta un must y nos partido cu a introduci AZV tambe na Aruba semper a para pa nos pueblo cu tin derecho ariba cuido medico y awor aki e ta bai bira mescos cu otro paisnan den Latino America cu nos hendenan no tin e derecho aki. Ta bai corta net den e grupo aki. Wyatt-Ras ta haya esaki sumamente lamentabel. Tin otro caminda pa corta vet y minister mester bai sinta wak unda esaki ta. Wyatt-Ras a haci minister varios pregunta tocante di AZV te ainda no a haya contesta di minister. Ora puntr’e den reunionnan ki dia ta haya e contesta e ta hari chwercha. Ta lamentabel cu nos tin un seguro medico di cual nos ta un ehempel pa cu otro paisnan y awor ta net contrario nos ta bai corta den nos hendenan humilde den nos cominidad y AZV lo no ta un ehempel manera antes mas.