E consulta interparlamentario di Reino, IPKO, a tuma lugar diaranson cu diahuebs ultimo pa prome biaha den forma virtual hunto cu Parlamento di Hulanda, Aruba, Corsou y Sint Maarten caminda a discuti temanan en comun.“Cu un agenda menos yen cu normal, pero sinembargo di igual importancia mirando e desaroyonan rond di e condicionan di e sosten financiero y recuperacion economico di e partinan caribense,” asina Parlamentario Richard Arends, miembro di fraccion di AVP, a declara.

“Un punto cu sigur a bin dilanti ta e posicion di e representante di pueblo den un situacion di crisis, con pa atende cu esaki, con tin cu percura pa e derecho fundamental di nos democracia ta keda manteni, con nos por keda eherce trabou di control riba e diferente gobiernonan y con por garantisa cu derechonan constitucional di e ciudadano keda wordo manteni y protehi. Obviamente tur pais den Reino lo kier evita cu nan tin un gobierno cu kier goberna pa decreto y cu bou capa di un crisis ta atende diferente asunto cu no necesariamente ta regarda e crisis.”

“No solamente tin e riesgo cu ta uso di e oportunidad di e situacion di calamindad pa atende otro areanan di maneho, pero ta limita bo derecho di hasi negoshi y bo libertadnan di move pa un periodo extendi. Aunke cu e parti di salubridad publico tin prerogativa den esaki, pero como Parlamento nos no mester perde di bista riba e hecho cu e derechonan constitucional di cada ciudadano solamente por wordo limita cu proporcionalidad, hustifica y pa un tempo defini so,” e parlamentario a splika. E la referi tambe na un conseho recien di Raad van State riba esaki.

Parlamentario Richard Arends a sigui mustra cu durante di IPKO a atende tambe e asunto di generalisacion di e islanan durante e ultimo debate di Parlamento Hulandes riba e asistencia financiero pa e Aruba, Corsou y Sint Maart. E por a compronde te cierto punto cu tabata trata di politiconan hulandes defendiendo nan mes y hustificando con nan ta duna asistencia financiero di e pagado di impuesto hulandes na islanan ocho mil kilometer lew. 

E la sigui bisa cu e tono di e debate den Tweede Kamer por lo general tabata uno cu ta producto di e canabalismo politico cu tin ta bibando aki na Aruba pa consumo local. Ningun Gobierno, cual sea esaki por ta cu ta na mando, tin un bentaha den esaki. Esaki ta pone Aruba den desbentaha na mesa di negociacion pa  loke ta trata e condicionnan pa financiamento cu lo mester tin atrobe pronto atrobe. 

E la sigui splika cu Reino riba su mes no ta un entidad cu tin fondo. Ta Estado Hulandes ta esun cu ta presta e islanan aki placa. Durante e reunionan a subraya e hecho cu mester tin un participacion mas activo di e Parlamentonan di Aruba, Corsou y Sint Maarten, ora ta trata asuntonan di Reino den Parlamento Hulandes. Mientras cu sosten financiero ta e prome paso, pero e discusion nan riba plannan riba termino cortico pa asina por rehabilita nos economianan mester sigui. 

E siguiente IPKO lo ta na inicio di januari y Aruba lo ta e pais anfitrion.