Dia tras di dia, atraco tras di atraco, tension tras di tension den cuerpo policial pero Minister di Husticia Andin Bikker, no ta Sali bin dilanti y duna cara na pueblo, Marlon Sneek miembro di fraccion di AVP a mustra.
Sinembargo henter e pasividad aki, e falta di tin solucion pa problemanan grandi di nos pais, ta algo cu ta biba cerca practicamente henter conseho di Minister, ya cu riba tur tereno, den tur ministerio, tin problemanan grandi pa soluciona pero cu gabinete Wever Croes no tin solucion pa nan.
“Por ehempel pueblo por mira cu nos tin un Minister di Husticia cu ta manera un lamchi den pesebre, pues un adorno y nada mas ya cu e no ta Sali bin dilanti y sigura pueblo cu e tin criminalidad bou di control manera cu el a priminti di haci y no a haci.
Tin un Minister Presidente kende constantemente ta gaña, algo cu nos a kere cu e lo a haci solamente durante di campaña pero awor e gañamento ta sigui den gobernacion.
Manera maestronan di scol diabierna ta sali for di un reunion cu Minister di Enseñansa den cual Lampe ta bisa nan cu no tin nada pa discuti, cu scol Paso pa Futuro ta bay muda y ora cu nan yega cerca Prome Minister y informe cu tal cos a pasa, e ta bisa e maestronan cu e no tabata na altura di esey y cu e ta bay chek.
Un gañamento di marca mayor ya cu Minister Lampe a mustra cu e decisionnan aki a wordo aproba den Conseho di Minister, caminda Evelyn Wever Croes tabata presente pero awor ta pretende cu nan a trata 18 punto y cu na 8 punto el a duna su aprobacion pero no ta corda awor.
Un di e ocho puntonan tabata e situacion cu ta pasando na scol Paso pa Futuro pero segun Prome Minister e no ta corda pero despues ta confirma cu esey tabata un di e puntonan.
Den e caso aki tin cu menciona cu Minister Lampe ta insisti cu e kier muda e scol, ta para ariba cu e ta bay hacie pero ta Minister Presidente ta esun cu ta gañando e maestronan cu esaki ta algo cu no ta bay pasa pero simplemente e no por bisa Lampe nada na e momentonan aki.
E situacion den enseñansa no ta algo di awo pero for di algun tempo caba caminda maestronan a yega di reunion den edificio di MFA caminda nan a informa parlamentarionan di tur loke ta pasando du DPS y minister su plannan.
Parlamento a sostene un mocion den forma unanime den cual ta prohibi Minister Lampe di mishi cu DPS pero e minister a sigui haci loke cu e kier y a sigui dilanti cu su plan di kibra DPS for di otro.
Fraccion di AVP dos siman pasa a entrega un mocion di desconfiansa contra Minister Lampe pa su maneho desastroso y e falta di respet na parlamento, pero parlamentarionan di MEP a dicidi cu e stoel den gobernacion bal mas cu enseñansa di nos mucha y hobennan.
Awe Minister Lamper tin mas poder cu nunca, e ta haci loke cu e kier y MEP tin cu guli tur loke nan ta haciendo ya cu de lo contrario no tin gobierno mas.
Prome Minister a sinta cantidad di biaha cu maestronan di scol, a gañanan den nan cara y a priminti un contesta cu te ainda ainda e no a duna y tur esaki pa keda sinta riba e stoel di Prome Minister, ya cu e tin cu caba di fix su cosnan prome.
Esaki un biaha mas a keda demostra na momento c’un grupo di maestronan, mayor- y studiantenan a bin cerca Prome Minister, kende a Sali topa cu nan cu smile riba su cara, un biaha mas sigurando cu e lo bay papia cu Minister Lampe.
Sinembargo tur hende sa cu Minister Lampe no ta ni kibra cabes cu Prome Minister ya cu su partido RED cu sin solamente un asiento den Parlamento, tin mas poder na e momentonan aki cu e 8 asientonan den parlamento y un bes mas Prome Minister ta scoge pa e stoel dushi y laga enseñansa di Aruba sigui sufri bou di un minister totalmente incapacita mescos cu henter e gobierno,” Parlamentario Marlon Sneek a declara.
