Siman pasa  fraccion di AVP, a vota contra diferente mocion den parlamento durante e reunion cu Minister Lampe. E mocion cu si nos a sostene ta nos mocion cu tabata un mocion di desconfiansa contra e minister di educacion, miembro di fraccion di AVP, sr Robert Candelaria a declara.

“Un ehempel di un mocionnan cu nos no a sostene ta esun di ‘flexibele bevorderingsnorm’, esaki ta e norma pa bay over. Ta importante pa bisa cu den e caso aki nos no a vota contra e mucha pero nos a vota na beneficio di e mucha.

Un di e motibonan pakico nos a vota contra ta pasobra minister Rudy Lampe a bisa den Parlamento cu te na e momentonan ey,  no tabatin un ‘bevorderingsnorm’ mes pa e aña escolar aki. Con nos por vota pa flexibilisa un norma cu no ta existi mes?

Si no tin ‘bevorderingsnorm,’ ta imposibel pa un mucha keda sinta.

Nos a compronde cu ley ta stipula cu pa yega na e ‘bevorderingsnorm’ pa un aña escolar, Minister ta ‘leg vast’ loke un schoolbestuur y inspectie ta overleg cu otro.

Interesante ta cu durante e reunion, minister Lampe a bisa cu e ta para pa e principio pa niun mucha keda sinta y tambe e ta para pa ‘passend onderwijs.’ Passend onderwijs ta sona sofestica y bunita si bo no sa kico e ta. 

Loke passend onderwijs ta den opinion di minister Lampe ta nifica,  cu e ta degrada e nivel di scol di e mucha. Passend onderwijs real ta ora bo ta yuda e alumno cu yudansa specificamente nesesario pa e mucha pa e no cay atras of keda sinta.

Pero  loke minister Lampe ta compronde bou di esaki ta diferente y pa e motibo ey, ‘passend onderwijs’ di Lampe den mi opinion ta pio cu keda sinta.

Lagami duna algun ehempel.

Un mucha cu ta den VWO 4 y lo mester keda sinta e aña aki, segun ‘passend onderwijs’ lo bah’e pa HAVO 5 y e lo mester traha examen mesora e siguiente aña.

Un mucha cu mester keda sinta den HAVO lo wordo manda MAVO y un mucha cu mester keda sinta den MAVO, lo bay EPB. 

Esey den mi opinion ta pio cu keda sinta pasobra e mucha mester cambia scol inhustamente y tur esaki, net e aña aki cu Covid a dificulta e enseñansa di e hoben.

E mucha no a haña chens pa haña tur les pa demostra su mes.

Nos ta haci un apelacion riba tur profesional den enseñansa, pa traha hunto y yuda e muchanan cu a perde hopi les den e aña escolar aki, pa nan por catch up mas tanto cu ta posibel pa nan haal in loke nan a perde,” Parlamentario Robert Candelaria a trece dilanti.