Melvin Tromp, miembro di partido AVP a mustra diamars ultimo cu a base di informacionnan clave, tin indicacion c’un compania establece na Corsou, lo a haya permiso pa bin traha den e planta di awa y electrividad di Aruba, esta WEB Aruba NV.
Segun sr Tromp tur cos a mustra cu Prome Minister Evelyn Wever Croes a dicidi di habri man y permiti cu e compania aki na Corsou, trece 100 trahado di e isla aki pa bin haci trabounan den WEB mientras cu tin cantidad di trahado di Aruba mes, cu por haci e trabounan aki.
“Aki un biaha mas nos por mira cu gabinete Wever Croes simplemente nunca por a presenta un vision caminda interes di nos hendenan aki na Aruba ta na prome luga.
Den un periodo di crisis caminda e propio Prome Minister di Aruba practicamente tur dia tabata bay television y insisti na pueblo cu e situacion di covid-19 a hinca nos pais y trahadonan den un situacion delicado, ta bira haci net lo contratio di e interes di nos propio hendenan.
Ta lanta e pregunta na Prome Minister Evelyn: ‘Kico ta conduci cu nos yiunan di tera como tecnico no por wordo reculta of bin na remarca pa haci e trabounan aki’?
No solamente e parti ey so pero tin otro aspectonan cu ta hunga un rol grandi den e asunto aki y cu Prome Minister Wever Croes, kende ta e minister responsabel pa WEB, tin cu tuma na consideracion y na cuenta na momento cu presente e situacionnan aki.
Covid-19 ainda ta activo na Corsou cu casonan adicional y no lubida cu Prome Minister di Corsou a bisa cu frontera lo keda cera pa Aruba, pues ningun buelo lo por sali di Aruba pa Corsou.
Informacionnan fededigno ta mustra cu ya caba tin tres container cu ekipo di trabou a yega for di Corsou y lo ta staciona caba na WEB Aruba NV di e compania di e isla ey.
Mientras cu ta pidi ayudo financiero for di Hulanda pa yuda mas cu 30 mil trahado cu lo a keda sin salario den e crisis grandi aki, por mira cu Gobierno ta sinta permiti e tipo di cosnan aki, caminda nos propio trahadonan tin mester di trabou pero tin cu para mira otronan yega for di otro isla pa haci algo cu nan mes por a haci y yuda nan famia.
Nos ta puntra Prome Minister ta na unda e proteccion di nos clase trahado a keda cerca su gobierno? Na unda participacion husto di nos contratistanan di Aruba a keda?
Ta bin acerca cu mirando e crisis grandi cu nos isla ta pasando aden, henter e asunto di 80-20 no por ta aplicabel den e situacionnan aki, ya cu seguridad di trabou di nos hendenan ta bin na prome luga y riba tur interes di otronan.
Den e proceso pa lanta nos economia bek, ta necesario pa evita cu e tipo di cosnan aki ta pasa y nos propio hendenan ta sali perhudica, ora cu gobierno ta tolera e tipo di cosnan aki.
Aki no ta trata di unda e compania aki ta bin pero Aruba tin trahadonan tecnico sumamente capas pa ehecuta e tipo di labornan aki y nos hendenan den e tempo di crisis aki tin cu bin na prome luga.
Prome Minister kier hunga ron di bon Mama pa otro y mal madrasta pa nos propio yiunan di tera y aki tin cu mustra cu e situacion ta malo pero gobierno ta lubida riba e situacion economico dificil di su propio hendenan y di e pais.
Nos kier mira e situacion aki wordo atendi den un forma rapido, pa motibo cu esaki no por wordo acepta sin mas, muy en particular si nos mira cuanto hende a perde nan trabou recientemente den e refineria y otro companianan local den e mundo di contratistanan tecnico,” sr Melvin Tromp di AVP a declara.
