Mientras cu gabinete Wever Croes a lockdown henter a pais, a pone pueblo bou di un toque de queda, a introduci un shelter in place pa limita hendenan canando rond, na un solo sitio ningun relga tabata conta, segun miembro di Parlamento Mike de Meza a declara.
“Prome Minister na nomber di su gobierno a introduci cantidad di regla di seguridad pero ta bin resulta cu ningun di e reglanan aki tabata conta pa tereno di refineria.
Desde cu Evelyn den nomber di su gobierno a firma e aregla cu CITGO, cu tabata na inicio di e corona crisis aki na Aruba, trabounan a sigui ‘doodnormal’ riba tereno di refineria, caminda a kita nomber di CITGO for di tur e tankinan, mientras cu trabounan di limpiesa y mantencion di tankinan a inicia.
Pues den un periodo cu a manda tur hende cas den e pandemia, companianan di construccion no tabata wordo permiti pa traha y cantidad di trahadonan a perde nan salario, gobierno a duna lus berde pa trabounan sigui riba tereno di refineria y aki pueblo por mira con gobierno ta midi cu dos midi.
Tur cos ta indica cu ya caba gobierno tin un acuerdo c’un grupo cu lo huur e tankinan aki for di gobierno pa un periodo largo pa almacena petroleo cu aparentemente ta procedente for di Colombia, algo cu e compania di pueblo, e companai di gobierno RDA mes por a keda encarga di dje.
No solamente esey awor tin tur indicacion cu e compania FMSA cu ta otro compania di gobierno, pues un compania di pueblo, lo no bay ta encarga mas cu entregamento di fuel pa avionnan y distribucion di gasolin.
Ya tin un compania di amigonan, di friends and family cla pa tuma FMSA for di pueblo y asina nan dicidi cuanto pueblo tin cu paga pa gasolin y ki ora esaki ta subi of baha, mientras cu FMSA ta un compania cu tabata cay bou di RDA trahando pa interes di pueblo.
RDA mes ta drentando su ultimo etapa caminda tin informacion cu ta indica cu ya caba Prome Minister Evelyn Wever Croes y su gobierno, a dicidi cu lo bay over na desmantela e refineria, pa cual lo bay encarga varios compania cu e trabou aki y ora cu e proceso aki termina, cu lo por tuma cinco pa ocho aña, RDA lo stop di existi.
Aki ta bon pa analisa e presencia di un ex Minister den seno di RDA, cual tabata un sorpresa grandi ora cu esaki a bira conoci, un ex minister cu ta cobrando ‘overbruggingstoelage’ pero su presencia ta bolbe demostra cu ‘friends & family’ tin ‘something cooking’ pa privilegia nan mes atrobe a costo di pueblo.
Ta mesun gobierno aki den pasado a para na porta di refineria y a papia di ora zero, a papia di momento crucial pa pueblo di Aruba y di San Nicolas, caminda reapertura di e refineria tabata primordial pa nan y caminda Glenbert Croes tabata embahado di su partido cu gobierno Venezolano pa logra cumpli cu e proceso di reapertura.
Awe un biaha mas un gobierno di MEP a cera e refineria y awor ta rancando tur interes di pueblo den e refineria pa otronan biba na grandi y pueblo sigui pasa den e miseria cu gabinete Wever Croes a ocasiona den apenas tres aña di tempo,” Parlamentario Mike de Meza a señala.
