Segun Parlamentario sra Arends- Reyes e siman a habri cu mayoria di scolnan a habri nan portanan pa ricibi alumnonan back despues cu na Maart mester a sera tur scol. E esfuerso di e scolnan, cabesantenan, maestronan y mayornan pa cumpli cu programanan pa e alumnonan por a keda ricibi les riba distancia tawata un esfuerso hopi intensivo y grandi. Y ta algo di aplaudi y aprecia pa motibo cu no ta descarta cu lo mester bolbe hasi’e. Ningun momento no por a considera cu e maestronan tawata tin un vacacion of tempo liber dimas. Despues cu gobierno a considera cu nos ta ainda den un temporada di emergencia a opta pa habri scolnan cu mitar klas y gruponan mas chikito di mucha. Hasta tawatin pensa pa continua cu mitar klasnan henter e aña escolar nobo. Scolnan y maestronan a traha sumamente duro pa prepara pa e apertura di scol back segun tur e reglanan stipula. Tur mayor a haña nan ta adapta nan schedule tanto di cas, trabou y hasta a cuminsa paga centro di cuido extra pa e jiunan dia cu nan no tawata tin scol. Riba e prome dia di a habri scolnan gobierno a bolbe bin cu un cambio cu den 7 dia tur mucha por bolbe bai scol huntu y full time. E pregunta cardinal a keda door cu a pone e palabra ‘por’ habri a pone e regla pero a tire den scochi di directivanan y scolnan pa wak kiko nan ta hasi. Atrobe ta trece inquietud innecesario bou di e grupo cu ta percura pa Enseñansa, un trabou cu mester wordo hopi mas balora den tur sentido di palabra. Tur hende ta consiente cu e virus peligroso aki a bin pa keda y e pueblo su destino tanten ta keda den man di gobernantenan cu cada biaha no ta stipula un liña di maneho siendo cu e protocolnan y fasenan ta conosi cu pueblo por prepara nan mes debidamente. Dimes cu Aruba tin 30 mil persona cu a perde trabou, e ta afecta e bienestar di nos pueblo y su salud. Biba den incertidumbre no ta yuda nos pueblo, gobierno mester bai sinta y presenta un plan mas concreto cu no ta cambia cada dia cu sende television. Den un corto tempo a purba stimula pa tuma gruponan back na trabou cobrando minimo di 20% menos te cu proximo aviso siendo cu e gastonan y cuminda no lo reduci den prijs. Hasta oficina central di estadistica a indica cu aumento di prijs den e sector di cuminda y e canasta di consumo a conoce un aumento di prijs. E bestaansminimum pa un famia di dos adulto y dos mucha a bira fls 5002,- e la conose un aumento di casi 100 fls compara cu April aña pasa. Nos sa tambe cu Aruba tin gruponan di personan indocumenta cu no tin trabou ni manera di biba y den nan tin muchanan tambe, e ta un realidad amargo cu mester trece den luz di dia y puntra cual ta e planan pa cu esaki. Aki 2 siman pa 1 luna lo habri frontera back pa vuelonan comercial cu un 10% estricto di locual ta custumbra cu ne pa siman. Usualmente ta 25 mil pasahero cu awor lo cap na 2 mil pasahero pa siman. Cruceronan te ainda no ta come in the picture, ta con e comerciantenan lo sobrevivi cu 10% di turismo pa siman pa e proximo lunanan? Kiko ta e plan cu gobierno tin pa Aruba su pueblo otro cu no ta e hotel yen di patiënt di Corona. Nos ta bai back na Shelter in place y scolnan lo mester sera?, dus mester prepara pueblo pa locual cu por spera nos atrobe den e temporadanan nos dilanti. Y mirando cu no ta existi seguro di viahe cu ta cubri Covid-19 AZV lo por cubri e casonan critico? Ja ambtenaarnan a sinti cu e ‘garantieverklaring’ di e beneficio di AZV plus hopi caminda no ta tum’e mas dus gobierno mester ta honesto cu pueblo ariba kiko ta wordo dicidi pa e pueblo. Mester respeta tur cu ta biba riba e baranca aki, trata e pueblo cu dignidad y no tira na cara cu tur hende inclusive ambtenaarnan lo yega un punto cu lo cobra bon di cuminda enbes di salario, paso mi ta duda cu banconan lo acepta bon di cuminda pa paga hypotheek. Menasanan asina ta golpi den herida y no ta yuda ningun hende. Tambe e pregunta di unda lo saca e 1 biyon florin den presupuesto 2020 cu falta y bou di ki condicion y a costo di ken lo logra haña e fiansa aki. Ta keda na pueblo pa ta bon prepara pa nos sobrepasa e periodo dificil aki pero esey no ta kita cu gobierno mester percura pa salbaguardia e interes di Aruba y su pueblo na tur momento.