Despues di 13 ora di reunion y despues di mas c’un aña cu fraccion di AVP ta wardando riba Minister di Enseñansa pa duna claridad riba su maneho pa loke ta enseñansa, ya cu loke el a bin ta haciendo, ta un masacre den enseñansa di e pais.
Lider di fraccion di AVP, sr Marlon Sneek despues di e reunion a mustra cu fraccion di AVP a presenta un mocion di desconfiansa contra di Minister Rudy Lampe mirando e maneho desastroso cu el a bin ta hibando pa cu enseñansa.
“Nos a presenta un mocion di desconfiansa no solamente a base di loke nos ta cuestiona di e maneho malisimo di e Minister pero tambe por a mira cu di parti di maestronan di scol na dos ocasion caba a bin dilanti di Parlamento y a duna nan disgusto grandi pa e forma con e minister aki a bin ta atendiendo cu enseñansa.
Pero mas cu tur cos e disgusto di e maestronan di scol tabatin di haber cu e forma con e minister aki ta hibando su maneho y sin duda e forma con el a bin ta atendiendo cu maestronan di scol.
Por mira cu no tin un respet di parti di e minister aki y ta tuma decision manera cu e ta desea y den e reunion aki un biaha mas el a confirma cu su persona ta tuma ta tma decision y tur hende tin cu biba cu su decisionnan.
E forma di pensa y di actua aki di parti di Minister Lampe pa fraccion di AVP ta inaceptabel y pa tal motibo nos fraccion a presenta un mocion di desconfiansa contra su persona pero lamentablemente nos fraccion tin cu informa cu e mocion aki no a haya e mayoria.
Solamente e nuebe miembronan di fraccion di AVP den Parlamento a sostene e mocion aki loke ta nifica cu fraccion di MEP, fraccion di POR y fraccion di RED Democratico, ta sostene totalmente e masacre cu ta tumando luga den enseñansa di Aruba.
Pa nos esaki ta di lamenta, sigur den un situacion dificil manera e pais ta pasando aden cu e covid-19, ainda nos tin un minister cu ta cabando cu enseñansa aki na Aruba.
E ta tumando decisionnan descabeya, desproporciona y poniendo asina un presion innecesario riba loke ta e veld di enseñansa y kitando oportunidad di nos muchanan di por desaroya y di por tin oportunidad pa asina nan por tin un dia un diploma den nan man.
Fraccion di AVP ta haya henter e desaroyo aki algo di lamenta y sigur ora cu nos a mira un cantidad di otro mocion cu fraccionnan di gobierno a presenta den un intento pa haci nechi.
Un di e mocionnan aki tabata pa no kita ningun werkster for di trabou manera ta intencion di e minister pero ya tur hende a scucha e minister aki bisa cu e ta bay kita nan of loke e ta bay duna nan ta un suma di 650 florin pa luna.
Esaki pa AVP ta inaceptabel y nos sa cu na 2015 bou maneho di Gabinete Mike Eman II, a bin c’un maneho y un decision cu Minister di Enseñansa e tempo ey a ehecuta tambe, caminda cu ta trata tur werkster como un trahado digno kendenan ta percura pa entre otro tin mesun klasnan dio nos yiunan limpi y percura pa nan tin tur beneficio y awor minister Lampe ta bin corta e beneficionan aki.
Awor fraccionnan di gobierno a presenta un mocion populista caminda a mustra cu ta bay haci lo maximo pa e werksternan no perde nan trabou y ora cu nos mira e tipo di mocionnan aki, e ta un berguensa grandi pa motibo cu un enseñansa bou di AVP tabata gosa cu mas di 20% di e presupuesto total di gobierno, awor ta wordo corta y ta deshaci di e parti importante aki, cu ta educacion y formacion di nos yiunan.
AVP semper a para pa enseñansa y por corda bon cla con scolnan bou gobierno di MEP a wordo cera, e tempo aya APA y despues danki na AVP nos tin awe un IPA, universidad a somenta y a bin bek bou di AVP y asina por sigui menciona un lista caminda bou gobierno di MEP a bisa tur hende pa bay Hulanda ya cu aki na Aruba no tin perspectiva.
AVP a drenta gobierno na 1986 y a crea un perspectiva ey y semper nos a kere den enseñansa y pa e motibo aki nos ta bisa Minister Rudy Lampe cu e tin cu bay cas, ya cu e ta haciendo hopi daño y e por bira un daño ireparabel,” lider di fraccion di AVP, Marlon Sneek a declara despues di e reunion di diamars ultimo.
