Gobierno ta confirma cu bou di capa di corona virus, a bay over na impone toque de queda pa asina abusa di pueblo, segun miembro di fraccion di AVP, sr Arthur Dowers a trece dilanti.
Toque de queda awe, despues cu shelter in place a wordo suspendi, ta keda na vigor y ta algo cu gobierno mes a declara y confirma, Parlamentario Dowers a sigui mustra.
“Nignun momento gobierno a mustra cu tabatin un rason valido pa gobierno a bin cu e toque de queda ya cu e riesgo pa un hende wordo contamina cu e corona virus si e core den su auto despeus di 9’or di anochi, no tabata existi.
Sigur si tabatin un shelter in place cu tabata conta pa anochi tambe, mesun reglanan cu tabata conta pa oranan den dia, caminda no tabata permiti aglomeracion di hende y mester a tene distancia social, e reglanan aki tambe por a conta pa oranan di anochi.
Pues ningun momento tabata necesario pa bou di capa di corona virus introduci un toque de queda, anto e forma con gobierno a impone e toque de queda aki, como sifuea esaki tabata pa salba pueblo, salba nos salud, nos seguridad, garantisa cu hende no ta bay muri di corona virus, esey tabata un decision sumamente lamentabel.
Ta penoso pa mira con un gobierno a haci un abuso asina grandi contra asina tanto hende, caminda a bati hendenan humilde riba nan patio, a detene hende y duna nan boet di mil florin, hendenan cu no tin mucho recurso financiero ni pa nan come, simplemente pa motibo cu gobierno tabata kier a haci mal uso di un autoridad cu den cierto sentido, nan no tabatin tampoco ey.
Simplemente gobierno a usa un capa di camalidad pa por a abusa di hende y mi ta kere cu denun democracia e tipo di maniobranan aki no tin mag di pasa y nos a bisa cu inicialmente nos no a cuminsa denuncia publicamente e tipo di abusonan aki, apesar di nos duda den e decisionnan di gobierno pero si pa evita cu pueblo a lanta contra gobierno.
Sinembargo nos ta haya sin duda cu loke a pasa cu e decision di gobierno, ta algo bergonsoso den un democracia y nos ta haya tambe cu gobierno tin cu duna cuenta na pueblo pa esaki pa motibo cu no por ta posibel cu ta abusa di hende di e forma aki.
Anto awor cu ta kita e shelter in place y ta bisa pueblo cu na e momentonan aki no tin practicamente corona virus den e pais, ainda gobierno ta sigui insisti cu hende no por core den nan auto despues di 11’or di anochi.
E decision aki ta laga tur hende compronde bon cla cu gobierno su intencion ningun momento tabata pa proteha hende contra corona virus pero simplemente a mal usa su poder y na e momento aki nos tin cu pidi gobierno pa bin duna cuenta riba esaki.
Pa dianan largo y keto bay ainda, hendenan ta ansha ora anochi cera ya cu nan kier yega nan cas pa no wordo deteni y wordo multa pa mil florin, ya cu mayoria di hende simplemente no tin e suma di placa aki pa regala gobierno na e momentonan aki.
E solo hecho cu a duna permiso na cierto luganan cu ta funciona den oranan di anochi y ora specifico na cual nan tin atene nan mes, ta sigui presiona pueblo pa nan core yega nan cas y riba varios medio di comunicacion por a mira accidentenan cu a sosode ora cu ciudadanonan tabata core pura pa yega nan cas,” Parlamentario Arthur Dowers a declara.
