Diabierna atardi Parlamento a aproba e concepto di ley caminda miembronan di parlamento ta entrega 25% for di nan salario pa asina duna un aporte na e situacion actual cu e pais ta pasando aden.
Miembro di fraccion di AVP, sr Michael Lampe a mustra despues di e reunion cu ta sumamente tristo pa mira con e proceso di aprobacion a dura asina largo, debi na e guera cu tabatin entre e fraccionnan cu ta sostene gobierno, riba kende lo presenta e ley y cuanto e porcentahe cu e miembronan lo tin cu entrega.
“Mientras cu e weganan politico aki tabata tuma den seno di e fraccionnan di gobierno, Aruba ta pasando den momentonan dificil caminda parlamentarionan mester duna ehempel di ta solidario cu nos pueblo pero lastimamente e weganan politico aki tabatin nan prioridad.
Weganan cu ta bin net di e generacion jong cu a Sali bisa for di comienso, cu e generacion nobo aki lo ba hiba un politica profesional y cu nan ta gelink cu pueblo y ta para cu tur hende den e trabou cu nan tin cu eherce.
Aki tin cu mustra cu mientras tabatin un rancamento di cabuya entre MEP y POR riba kende ta bay duna cuanto y di unda, tur esaki a stroba e proceso pa baha salario loke a pone cu colega Arthur Dowers a presenta un mocion pa ancra e 25% aki, sino e lo bay tarda mas hopi ainda loke ta inaceptabel pa un proceso cu ta asina importante na e momentonan aki.
Nos tin hendenan cu ta perdiendo trabou, kendenan no tin entrada y ta nos tur hunto cu para duro hunto cu otro pa asina pasa dor di e momentonan dificil aki, caminda no ta momento pa hunga politica pero netamente un ocasion pa demostra como parlamento cu berdad tin un cambio, cu ta hala politica un banda, ta hala bo color politico un banda pa asina nos por para hunto cu Aruba.
Mi ta hopi contento cu nos por a tuma e iniciativa aki cu e mocion aki pa asina ancra e 25% aki y asina caba cu e discusion cu tabata existi entre fraccionnan di gobierno den parlamento y tuma un decision den esaki.
Awe nos a pasa e ley aki caminda e mocion cu fraccion di AVP a presenta, a wordo sosteni pa tur hende y para asina e discusion constante entre fraccion di MEP y POR por a yega su fin.
Loke ta remarcabel tambe ta cu nos por a constata cu gabinete Wever Croes a tuma over e mesun decision aki y ministernan tambe lo entrega 25% manera parlementarionan y mirando cu gobierno tampoco ta tumando decisionnan concreto den e periodo aki.
Aruba mester liderasgo caminda decisionnan serio ta wordo tuma pero den e caso aki no por a tuma esaki inicialmente pero ta gobierno Hulandes ta ancra e 25% aki tambe pa e ministernan di gabinete Wever Croes.
E caos ta birando mas grandi y pueblo ta buscando lidernan cu realmente por para cu e dolor di pueblo y nos ta ripara cu mas y mas e caos ta creciendo y lastimamente esaki ta creciendo den henter e pais.
Ta di lamenta cu esaki ta bayendo den e forma aki caminda entre otro gobierno no ta tumando decisionnan pa stimula economia di e pais pa e crece bek caminda por mira cu constantemente gobierno ta tene conferencia di prensa caminda ta papia di loke ta pasando pero sin duna plan concreto riba kico e ta bay haci pa atende cu e situacion,” Parlamentario Michael Lampe di AVP a declara.
