Hopi ta premira cu e angustianan despues di Covid, manera desempleo y problemanan social cu lo bira problemanan hudicial, lo ta mas grandi cu hopi ta pensa. E momento ta awor pa un realisacion profundo di e embergadura di e problema y delinea un vision cu tin e forsa pa atende cu e profundidad y magnitud di e reto nos dilanti.

Awor no tin tempo pa politiconan na mando keda mira den spiel patras pa tira acusacionnan di pasado pa asina kita bista di nan incapacidad. Awor mester di bon gobernacion y liderazgo pa nos pais den e situacion penoso actual  cu nos ta aden. E situacion ta demasiado grave y urgente pa laga esaki continua. 

E modelo aki di culpa otro pa tur cos crea caba tres aña di stagnacion na Aruba. Laga nos tuma e oportunidad aki pa purba e caminda nobo nos dilanti pa realmente sera cabes y traha hunto pa e Aruba cu tanto nos tur ta bisa cu nos ta stima. 

Rond mundo gobernantenan ta preparando pa flexibilisa medidanan cu a wordo tuma como consecuencia di Covid-19. Aruba no ta un excepcion. Pero tuma e desicion pa habri scolnan, nos frontera, hotelnan y barberianan etc so, lo nunca hiba nos na un estilo di bida manera prome cu Covid. Expertonan local y internacional ta mustrando nos cu un cantidad sin precedente di hende a perde trabou y no por biba mas na e nivel prome cu e virus.

Expertonan ta sugeri desicionnan drastico pa sobrevivi y ta premira scenarionan horendo despues di Covid. Mundialmente hopi a perde sernan keri y otro nan a sufri hopi emocionalmente y mentalmente y no sa con pa enfrenta bida despues di Covid. Pero danki na Dios nos sa cu ta un hecho cu Covid lo no dura pa semper. Manera e dicho asina popular ta bisa, “this too shall pass”. E pregunta cu ta keda colga den halto  e ora ta: y kiko awor? 

E reto aki y su golpinan ta asina profundo cu comunidad di Aruba mester di un perspectiva den cual e por kere y pone su confiansa. Esaki ta totalmente ausente na e momentonan aki. Nos no ta mira e liderazgo pa guia Aruba awor for di e crisis aki den e gobernacion di nos Pais cu ta asina fragiel, labiel y dividi.

Mientras nos ta mira si pafor di gobierno hopi ehempelnan den e temporada aki di hende cu no ta satisfecho cu sinta na banda y observa loke ta pasando, pero a sali y sirbi otronan boluntariamente. 

Pa logra reanuda bida, Aruba awor mester di su lidernan pa lanta para y tuma posicion. Mi no ta papia aki di lidernan politico so. Un lider ta un persona cu den tempo difisil ta mira loke otronan no ta mira y por guia hende na un miho lugar. E ta mira oportunidad caminda otronan ta mira derota so. 

E lider por ta un maestro di scol cu ta duna su muchanan speransa. E lider por ta un empresario cu ta mira oportunidad nobo pa lanta su negoshi di nobo, mas fuerte cu prome. E lider por ta tambe un persona den comunidad cu ta yuda guia su hendenan na idea pa empleo nobo of na un sentido di comunitarismo renoba na unda e importancia di e famia, e bario y e iglesianan ta wordo poni central atrobe. Lidernan ta esencial pa hiba nos pais den un direccion di speransa na tur nivel den comunidad.

E ta obvio cu na e momentonan aki Pueblo di Aruba no ta hayando e perspectiva cu ta dune confinza cu nos lo supera e retonan aki. Nos no ta hayando e tanto dor di falta di capacidad den gobernacion y falta di credibilidad y base di sosten amplio den nos pais pa kere den locual gobernacion ta haciendo.

Sin e vision aki y sin e confianza amplio den pueblo, Aruba lo perde e oportunidad pa sali rapidamente y triunfantamente for di e crisis aki y lo keda stagna den incertidumbre. Pueblo di Aruba merece mihor !