Parlamento di Aruba a degenera completamente y simplemente no tin respet pa Parlamento ya cu Parlamento mes no ta exigi pa wordo duna respet, manera cu mester ta, segun miembro di fraccion di AVP, Arthur Dowers a mustra.
“Fraccion di AVP mas c’un aña pasa of mas cu esey, a pidi un reunion pa trata maneho di enseñansa di e Minister concerni y nos tabata desea pa e bin Parlamento pa responsabilisa su mes pa su maneho.
Un di e puntonan principal di e reunion ey lo mester a bira su maneho pa privatisa tur scol na Aruba pero e tempo ey su fraccion di AVP a pidi e reunion pero fraccion di MEP hunto cu POR a dicidi di core yama un ‘bijeenkomst’ na luga di e reunion publico, cu e unico meta pa stroba realisacion di e reunion publico aki.
Despues di esey na dos otro ocasion fraccion di AVP a manda pidi Presidente di Parlamento pa un reunion publico pero presidente Ady Thijssen practicamente a nenga di yama e reunion aki.
Awor nos por mira cu partido POR a core pidi un ‘bijeenkomst’ pa dia 15 di Mei y mesora esaki a wordo aproba y yama.
Fraccion di AVP tin pendiente dos solicitud pa reunion publico riba maneho di e Minister di Enseñansa pero esaki nunca a wordo haci y ta dor di e tipo di maniobranan aki, nos ta tribi di bisa cu Parlamento mes no ta respeta su mes y Presidente di Parlamento, no ta digno di ta Presidente.
Ady Thijssen no ta digno di ta Presidente di Parlmanto ya cu e no ta cumpli cu ley cu constitucion ta stipula ya cu ningun caminda ta stipula cu ta solamente fraccionnan cu ta sostene gobierno, por di yama reunion.
Ningun caminda tampoco e ley ta bisa cu ora oposicion haci peticion pa yama un reunion, e fraccionnan cu ta sostene un gobierno por bira yama un ‘bijeenkomst’ djis pa stroba fraccion den oposicion di haya e reunion publico cu a wordo solicita.
Nos a yega di splica nan caba den pasado, ora cu nan a haci e maniobranan menciona keriendo cu fraccion di AVP lo a bin c’un mocion di desconfiansa contra di e Minister pero nos por presenta cantidad di mocion di desconfiansa cu nos kier pero nan cu ta sostene gobierno lo no sostene esaki y e mocionnan aki lo no pasa.
Sinembargo si nos ta haya cu ta un falta di respet grandi ora cu Presidente di Parlamento ta nenga di yama un reunion publico caminda tur hende por discuti pa asina henter pueblo y e veld di enseñansa por mira kico ta pasando.
Simplemente mi ta kere cu partido MEP tin miedo cu ora cu bin un reunion publicamente y caminda nan tin cu mustra cu nan ta para banda di pueblo, cu nan ta para banda di enseñansa of cu nan ta para banda di e Minister y ciegamente partido MEP a mustra di ta para banda di loke ta robes, basta pa nan keda den gobierno ya cu partido MEP kier a costo di tur cos, keda den gobierno.
AVP ta lamenta e desaroyonan aki pasobra ta dor di tuma e posicion aki, enseñansa ta para na unda e ta awe caminda e Minister di Enseñansa a regala practicamente henter e infrastructura publico na stichting- y amigonan y ta preparando pa entrega e resto.
Tur esaki e Minister ta haciendo, basando su mes riba e hecho cu partido MEP tin miedo di dje, nan tin miedo di partido RED y esey ta pone cu e por haci y deshaci manera cu e ta haya ta bon.
Sinembargo nan no mester lubida cu nan no ta keda den gobierno pa sempern y tur esunnan cu coopera cu nan pa kita cosnan di pueblo na e momentonan aki y entrega esakinan den man di gruponan priva, lo bay paga mesun prijs cu nan lo bay paga ya cu pueblo lo keda desaproba e desaroyonan aki den enseñansa y comportacion di tur envolvi.
Sigur sigur mester bay evalua tur e cosnan aki bon y mientras cu awor nan por conta cu placa di subsidio, tin cu corda cu subsidio ta placa di pueblo y ora cu pueblo rechasa un maneho, esaki ta nifica automaticamente cu gobierno mester mara e consecuencianan na dje cu no por manda placa, no por sigui duna subsidio na organisacionnan cu pueblo den su totalidad no ta aproba kico nan ta haciendo.
E cosnan aki lo wordo ‘rechtgetrokken’ y tur envolvi lo tin cu para responsabel pa tur loke a pasa den enseñansa,” Parlamentario Arthur Dowers a declara.
