Parlamento a trata presupuesto di DOW diahuebs ultimo caminda un biaha mas gabinete Wever Croes, ta bolbe confirma cu e hende no ta central pa e gobierno aki,
Lider di fraccion di AVP, sr Marlon Sneek ta mustra cu no por haya ministernan di e gobierno actual, actuando den un forma sensato, dunando ehempel real cu nan tin pueblo na pecho ya cu maneho di e gobierno aki, ta puramente dirigi riba un grupo chikito di sponsor-, amigo y sostenedonan.
“ Ni 24 ora despues cu Parlamento a aproba un amienda di fraccion di AVP cu ta determina cu miembronan di Parlamento lo reduci nan salario cu 25% pa asina para manda di trahadonan cu tambe meter entrega salario riba peticion di Gobierno, e Minister di Infrastructura ta bin Parlamento c’un persupuesto cu realmente ta un ofensa pa henter pueblo.
Pa dianan largo Prome Minister tanto den oranan di merdia como anochi, a papia cu pueblo y a conta den tur forma posibel, cu e situacion cu nos pais y henter mundo ta confrontando, ta algo sumamente serio.
Dirigiendo su mes na trahadonan publico, Prome Minister Evelyn Wever Croes a sigura e trahadonan cu si nan no entrega parti di nan salario y parti di nan beneficionan, aki dos luna lo no tin placa pa paga nan salario mas.
Un declaracion cu a mustra riba un tipo di menasa pa sindicatonan convence nan miembronan cu nan cu entrega y tanto parlamento como gobierno a Sali dilanti dor di reduci nan salario tambe, gobierno cu 20% y parlamentarionan cu 25%.
Ni un dia a pasa cu den parlamento Minister Marisol Lopez Tromp ta presenta un presupuesto di DOW cu ta liña recta cu loke gobierno ta pidi trahadonan publico pa haci, esta di entrega den e tempo dificil aki caminda economia ta paralisa y miles di hende a perde nan trabou den sector priva.
Fraccion di AVP a presenta un amienda diaranson atardi caminda ta solidarisa cu tur hende cu a perde nan trabou pero un dia despues nos ta wordo soprendi c’un locura di marca mayor, cu pa colmo e tres fraccionnan cu ta sostene gobierno, ta bira aproba tambe.
Un presupueso caminda Minister di Infrastructura den e tempo dificil aki, ta haya ta bon pa aparta un suma di 9 miyon florin pa renobacion di Arubahuis, cual bou di ningun circunstancia lo por ta un necesidad na e momentonan aki.
Renobacion di Arubahuis no por ta un prioridad na e momentonan aki, caminda di un banda ta pidi Hulanda ayudo financiero di 1.3 biyon pa cubri e crisis economico y financiero cu Aruba ta pasando aden pero awor ta reserva 9 miyon pa drecha Arubahuis.
Pa completa obra e Minister ta hinca den su presupuesto pa 2020 un suma di 800 mil florin pa trabounan di infrastructura entre otro pa percura pa awacero no keda para na cierto sitionan rond nos isla.
Otro proyecto cu no ta mas necesario cu salario di casi 30 mil persona cu a perde nan trabou manera Minister di Finansa mes ta mustra y e falta di respet pa un pueblo cu ta pasando den calamidad nunca bisto, Minister ta pidi y haya sosten di e tras fraccionnan, pa pone un suma di 120 mil florin cu cual placa lo cumpra adornonan di Pasco pa fiestanan di fin di aña.
Economia ta paralisa, industria turistico ta completamente cera na lock, miles di hende a perde nan trabou, gobierno a pidi 1.3 biyon pa yuda tanto comercio como esunnan cu a perde nan trabou, negoshinan ainda no por habri, muchanan no por bay scol, hobennan no por practica deporta pero Minister di Infrastructura ta pone 120 mil florin riba presupuesto pa adornonan di Pasco pa fin di aña.
Lo mas tristo ta cu e tres fraccionnan cu ta sostene gobierno, a aproba esakinan tambe, mustrando un falta di respet total pa henter pueblo cu si no ta mira seriedad di gobierno den henter e asunto aki,” lider di fraccion di AVP, sr Marlon Sneek a declara.
