Relaciona cu Corona virus, Parlamentario Mervin Wyatt-Ras a dirigi 20 pregunta na minister Chris Romero encarga cu sector primario.
Segun e parlamenrario Corona virus tin consecuencianan devastador no solamente pa nos salibridad publico sino tambe pa loke ta trata Aruba su finansas publico, economia y tereno social. Turismo, nos pilar economico principal (90% di nos entrada) a haya un sla duro. Tur hotel a sera y trahadornan a wordo manda cas sea cu vakantie o sea definitivo. Alrededor di 25.000 trahador lo keda sin trabou. Esaki lo tin consecuencianan directo pa e famianan aki por cumpli cu nan prome necesidadnan, manera awa, coriente y cuminda.
Gobierno a priminti di yuda e trahadonan. Sinembargo awor ta resulta cu nan mester cumpli cu diferente criterio. Alavez tin un grupo cu ta cu no lo bin na remarca pa yudansa. Nan ta cai “tussen wal en schip”. E grupo aki ta consisti di esnan cu prome cu e crisis no tabatin no trabou ni un bijstand. Tambe ilegalnan lo pasa den tempo dificil. Por lo general por bisa cu un y tur ariba nos pais lo sinti consecuencianan di e crisis aki.
Un economo Caribense, Marla Dukharan den publicacion di Forbes a prognostica cu e region Caribense lo perde mas o menos 83% di su entradanan. Esaki por afecta reservanan y por tin consecuencianan serio pa e paisnan cu ta hopi dependiente di importacion di productonan agrario. El a senjala cu nos tin di haber cu un crisis di salud, poco o hasta zero actividadnan economico, mercado financiero cu ta varia, falta di confiansa den inversion, huida di capital, entradanan di impuesto nihil of abou, prijsnan mas halto ainda, falta di productonan y mas demanda na mechanismonan di ayudo social. Lo tin un dado momento scarsedad na placa y demanda mas halto na cuminda y productonan di primer necesidad. Pa paisnan cu ta dependiente di Estados Unidos pa nan fruta, berdura y otro productonan esaki lo por tin consecuencianan grandi si tin un Shot Down di e pais aki pa exportacion. Pa preveni hamber y mas pobresa ta bira tempo pa bai inverti den technologianan di agricultura na beneficio di cambionan climatologico y cu ta bentahoso pa atende cu e crisis. Dor di esaki nos poblacion lo por bira menos dependiente di importacion y lo por bai produci propio productonan y hasta por activa otro tipo di servicionan y iniciativanan. Nos mester tin un “open mind” pa por atende cu retonan (mundial) den futuro.
Parlamentario Wyatt-Ras ta di opinion cu awor ta e momento pa wak con por stimula un otro desaroyo den nos pais, cu ta haci nos menos dependiente di turismo.
El a haci 20 pregunta na e minister. Entre otro si/con e lo bai inverti den tecnologiananan di agricultura, kizas cu sosten di TNO Delft. El a puntra ki otro tipo di dienstnan of servicio of otro  actividadnan lo por stimula? Si lo otorga terenonan (huurgrond) pa agricultura na ciudadanonan,
con pa yuda agricultornan existente y esnan nobo sin ”redtape” pa bai produci cuminda pa nos comunidad.
Con por traha hunto cu WEB NV pa implementa un palabracion haci ya caba den gobernacion anterior pa un tarifa special pa awa pa agricultornan y si por haci mas hunto cu WEB NV pa nan entrega awa gratis of na un bon prijs pa nos hendenan cu ta planta. Wyatt-Ras ta interesa pa sa con gobierno lo bai stimula famianan pa planta den nan propio jardin y con lo concientisa nos hobennan encuanto e importancia di planta simianan local y ki rol sta. Rosa lo tuma den esey. Wyatt-Ras ta spera di por haya contesta ariba su preguntanan.