Prome Minister Evelyn Wever Croes ya no sa mas con pa dorna su palabranan, of con pa convence un pueblo financieramente debilita pa su gobierno, cu e tin otro pakete di medida na caminda.
Lider di fraccion di AVP, sr Marlon Sneek a mustra dialuna ultimo cu den un estilo comico, papiando trankil y hasta dunando e impresion cu e por yora, Prome Minister Wever Croes ta bisa pueblo cu e tin mas medida na caminda y cu esakinan pronto lo yega Parlanmento pa wordo trata.
“Ya Prome Minister Wever Croes no sa mas con pa s’sugarcoat’ e siguiente pakete di medida, placa cu e lo bolbe ranca for di cartera di pueblo, pa cubri su aventuranan politico sin sentido.
Manera un declamado di poesia, Evelyn ta trata di bolbe convence pueblo cu e siguiente serie di medida ta na caminda y cu pueblo no mester preocupa, ya cu e medidanan aki ta dirigi riba solamente un grupo di chikito di hendenan.
Un grupo chikito cu segun Prome Minister ta bebe hopi alcohol y ta huma hopi sigaria, tambe riba un grupo cu a cumpra mercanicnana on line y pa kendenan su gobierno ta introduci un BBO na frontera, pero na final di dia e impuesto nobo aki lo afecta comerciantenan tambe.
Den un forma increibel y c’un cara di inocencia Prome Minister a trata di convence pueblo cu ‘deviezenprovisie’ lo afecta principalmente e Dominicanonan cu ta manda placa pa nan pais y cu segun su persona, e Presidente di e pais aki, a mustra na un ocasion cu e mandamento di placa aki, a bira un pilar economico pa Republica Dominicana.
Realidad di bida lo bira cu ta pueblo su cartera lo tin cu bolbe bay saca mas placa pa paga e deviezenprovisie aki y tambe e BBO na frontera ya cu e comerciante lo bay busca un caminda pa saca su placa bek y esaki lo ta riba lomba di pueblo.
Sinembargo pa Prome Minister Evelyn Wever Croes pueblo mester ta contento cu el a reduci pago di inkomstern y loonbelasting pa cierto gruponan den comunidad, cu el a reduci pago di grondbelasting pero e no ta bisa cu loke el a duna pueblo ta yega 16 miyon florin pero loke su gobierno ta ranca bek for di cartera di pueblo, ta e impresionante suma di 250 miyon florin.
Gabinete Wever Croes ta haciendo pueblo di Aruba dia pa dia mas pober, caminda den e di tres presupuesto cu e gobierno aki presenta proximamente, tin solamente medida pa pueblo y ningun pero ningun proyecto na interes di pueblo.
Deviezenprovisie lo afecta tur hende, no solamente comerciantenan cu tin cu cambia nan placa ora cu nan busca material y articulonan pa nan negoshi, pero tur hende cu tin cu manda placa pa nan famia den exterior, mayornan cu mester manda placa pa nan yiunan studiante pero pa Evelyn Wever Croes, esaki no mester ta un problema.
Ta impresionante scucha con Prome Minister su wowonan no ta ni kinipi ora cu e ta gañando pueblo c’un cara asina serio, papiando di un buraco financiero cu su gobierno kier tapa y no papiando mas di mega debe di proyectonan.
Desde cu a mustra pueblo siman pasa cuanto placa gobierno di Prome Minister Evelyn Wever Croes a ranca cu e famoso BAVP y caminda a pone pueblo paga mas cu loke tabatin mester pa paga proyecto, ainda e gobierno aki no por bin splica pueblo kico a haci cu mas di 20 miyon cu a resta di tur loke pueblo a paga.
No tin placa pa aumenta reparatietoeslag, no tin placa pa aumenta onderstand, no tin placa pa aumenta salario minimo, no tin ningun incentivo pa esunnan cu tin entrada hopi abou, pero sin ta mesun hendenan aki tin cu soporta e abuso di aumento di inflacion asina rapido, caminda cosnan ta bira mas y mas dificil pa cumpra.
Pero pa famia y otro amigonan, pa sponsor y sostenedornan di e gobierno aki, pa nan sin tin trabou y tin tur indicacion cu gobierno di Evelyn Wever Croes, ta sigui tuma hende den servicio di gobierno, contra tur palabracion haci cu Hulanda y CFT,” lider di fraccion Marlon Sneek a declara.
