Algo incomprensibel pa hopi hende, ta e decision tuma pa Corte di Husticia den e caso caminda un tata a admiti di a abusa sexualmente di su propio yiu muhe, hasta sacando su yiu na estado.

Parlamentario pa fraccion di AVP ta bisa cu “Sin duda mi a keda hopi asombra ora mi a tuma nota di 4 aña y mey cu e tata cu a saca su propio yiu na estado a haña como castigo, sabiendo cu e castigo maximo stipula pa ley actual, ta di 8 aña. Den pasado tabatin varios accion di gruponan den comunidad, cu a lanta vocifera esaki den pasado, exigiendo pa Husticia actua cu man duro contra abusadonan di mucha.”

Aunke cu mi no sa tur detayes di e caso menciona, e pregunta cu ta keda den pueblo y sigur cerca mi persona fungiendo como representante di pueblo, ta di con a opta pa pidi un castigo, asina abou pa e tata.

E forma pa combati abuso sexual y domestico mester ta un combinacion di accion cu ta encera castigo y tratamento. Ami ta kere cu un hende cu comete un acto horibel asina merece un castigo halto, pasobra esey ta hustcia. 

Sinembargo na mes momento mi ta kere cu abusadornan y especialmente esnan cu ta abusa di nos muchanan, mester haña tratamento obligatorio pa loke nan ta hasi pa nan no ripiti loke nan a hasi y nan mester arepenti di nan actonan. 

Sinta den un cel ta castigo, pero si no trata e persona aki, e riesgo pa nan bolbe sali y ripiti e hechonan aki ta grandi. 

Nan mester compronde cu loke nan a hasi ta condenabel y nan mester arepenti di nan hecho pa no hasie nunca mas. Famia y amistadnan tin ora tambe mester di ayudo profesional pa por apoya y guia e victima den futuro. 

Parlamento lo trata un cambio di nos Codigo Penal pronto na unda lo aumenta castigo maximo pa diferente delito sexual. Algun ehempel ta cu e delito sexual pa tene relacion cu un sexual cu un mucha cu menos di 12 aña ta subi di 12 pa 15 aña, y ora un hende tene relacion sexual cu un mucha entre 12 aña y menos cu 16 aña e castigo lo subi di 8 pa 12 aña. Asina tin hopi otro delito cu lo conoce un aumento di castigo maximo. Tambe lo bin cambio den e periodo cu husticia por persigui hendenan cu a comete sierto delito sexual den pasado. Pa e delitonan mas pisa, lo no tin limite mas na e tempo pa hasi denuncia contra nan. Nan ta keda castigabel y husticia ta keda cu e poder pa por persigui esnan cu a viola e leynan aki. 

Mi ta pensa cu ta importante pa importante pa splica kiko e proposito di nos leynan di nos Codigo Penal ta. Basicamente nos lo menciona  4 proposito cu e ley aki tin. Na prome lugar e ley tin como proposito cu e mester cumpli cu e nesesidad di castiga un persona cu ta viola e ley. Pues tur cu comete un infraccion contra ley, mester sinti e castigo di ley. Na di dos lugar e ley tin como proposito cu e mester tin un efecto preventivo. E mester spanta tur hende cu kier comete un infraccion pa asina evita cu nan lo comete e infraccion. Esaki ta insera e efecto pa duna e comunidad un sentimento cu e ley ta proteha e comunidad contra infraccionan. Na di tercer lugar e ley tin como proposito pa  evita cu pueblo ta sinti falta di proteccion y lo kier tuma ley den nan propio man. Pues pa motibo cu nos ta biba den un estado di derecho y nos comunidad a entrega e poder di castiga un hende cu a kibra ley na gobierno, pueblo mester tin e siguransa y satisfaccion cu su siguridad ta wordo ganatisa y cu esnan cu kibra ley lo risibi nan castigo husto pa esaki. Por ultimo por menciona cu e ley tin como proposito pa resocialisa esnan cu a kibra ley. E ley mester laga e persona cu a kibra ley compronde cu loke ela hasi no ta acceptabel den nos comunidad y cu tin consecuencia. Ideal ta si e por haña tratamento pa e siña cu e nunca mas por ripiti loke ela hasi cu a pone cu ela cay sera. 

Como tata di 3 yui muhe pero tambe como Parlamentario, tur biaha cu mi tende di hechonan asina e ta hasi hopi dolor. Pesey mi kier pidi pueblo pa usa nan bos, idea of cualkier sugerencia cu nan tin pa deal cu e issue di pedofilia den nos comunidad pa aserca mi persona y asina hunto nos trata na yega na solucion concreto y directo. Aunke e caminda ta mustra largo, mi ta convenci cu si nos no traha hunto, poniendo tur diferencia di idiologia of politica un banda, mi ta sigur cu nos lo yega na dal pasonan den e direccion corecto,” Parlamentario Robert Candelaria ta declara.