Lider di fraccion di AVP, sr Marlon Sneek a mustra diamars ultimo cu ta na su  luga pa bolbe pone den lus di dia, e hecho cu Prome Minister Evelyn Wever Croes, ta bay cera CITGO y e hendenan cu ta trahando den e refineria ainda, tambe lo bay cas.

“Esey ta e realidad cu tin na e momentonan aki caminda tin documento cu ta mustra cu cinco luna despues cu gabinete Wever Croes a tuma mando di e pais, un carta a sali cu firma di Presidente di Hunta di Comisarionan sr Richard Eman caminda ya caba for di e tempo ey a busca tur forma pa para e proyecto di reapertura di e refineria.

E carta aki a wordo dirigi  na oficina di tata di Prome Minister, esta Hendrik Croes, cu ta representa e Hunta di Comisario, caminda ta pidi pa studia e contract di CITGO cu pais Aruba y tambe pa studia tambe con termina e contracto of un formula pa anula  e contractnan aki.

Pues apenas cinco luna den gobierno, dia 9  di April di 2018, Evelyn Wever Croes a tuma e decision pa su gobierno, di busca tur forma pa para e proyecto aki di CITGO y esaki ta mesun hendenan cu a para c’un grupo dilanti di porta di e refineria c’un accion cu nan a yama ‘Ora Cero,’  mesun hendenan cu a bisa durante di reunion den Parlamento riba e contract aki, bisando cu “portanan cu ta habri pa Evelyn Wever Croes, no ta habri pa Mike Eman,”  awe pueblo por mira cu mesun Evelyn a dicidi cu ta cera ta bay cera porta di e refineria.

Nada di habri porta di e refineria pero cera definitivamente e porta di e refineria aki di San Nicolas, lubidando por completo cu ya caba tin mas di 40 miyon florin inverti despues cu contractnan a wordo firma, mencamp a wordo instala, ya cu inversionnan a cuminsa e tempo ey caba,  pero unico cos cu gabinete Wever Croes a haci, ta wak con ta kibra e contract aki.

Ningun momento a tuma tempo bisa cu ta bay pa sinta na mesa cu representantenan di CITGO  pa asina garantisa c CITGO ta bay cumpli cu e contract firma y cu e refineria lo bay bira operacional   finalmente.

Nos fraccion pa medio di mi persona a dirigi un carta na Prome Minister riba henter e proceso aki, puntrando entre otro kende ta negociando na nomber di Aruba pero awor nos a haya prueba cu ta oficina di su tata, a puntra kico ta negoshando pero nunca nos a ricibi contesta riba e preguntanan aki.

Ta bon pa menciona cu tempo gobierno di AVP tabata negociando pa logra un partner pa reapertura di e refineria, gobierno a bin Parlamento na varios ocasion caminda entre otro esunnan di oposicion e tempo ey cu awe ta den gobierno, a bin cu Nelson Inglish, caminda varios reunion tabata informa Parlamento di tur loke ta tumando luga den e proceso aki.

Awe Parlamento no ta wordo informa, Parlamento ta haci pregunta pero no ta haya contesta y ta riba caya tin cu bin haya tende cu tin un ‘deal’ cushinando.

Aki no mester lubida cu si tin un “breach of contract,”  ta un suma di 350 miyon florin CITGO tin cu paga pais Aruba y mester percura pa limpia henter e tereno di e refineria.

 Awor nos ta tende cifranan di 100 miyon,  di 150 miyon loke ta duna indicacion cu ya tin dealnan traha caba pa deshaci di e refineria y tur esaki pa kende djodjo, pa kende gosa  y di con no bay tras di e 350 miyon manera e contract ta stipula?

Nos fraccion tin preguntanan nobo manera di con ta papia di 100 miyon, di con ta papiando di 150 miyon, cual nos a manda pa Prome Minister Evelyn Wever Croes y nos ta spera e contesta e pregutanan aki.

Nos ta spera cu cu e cumpli cu loke e mes a yega di bisa, cu su gobierno lo ta uno transparente, cu e no tin nada di sconde, cu lo informa Parlamento, cu lo bin Parlamento pa duna cuenta, pero awe por mira cu no ta duna ningun sorto di cuenta, Parlamento tin lunanan caba sin mira un ley presenta for di gabinete Wever Croes.

E ultimo cu Parlamento a haya pa trata di esun na luna di december di presupuesto supletorio, cual by law e tin cu hacie ya cu di otro forma gobierno lo tin problema cu ley pero fuera di esey no tin nada mas pa pasando.

E gobierno aki no ta treciendo nada pa parlamento y no ta cumpliendo  mas cu loke nos ta yama bon gobernacion, caminda no ta bin Parlamento pa duna informacion  y ora cu parlamentarionan haci pregunta, esakinan no ta wordo contesta.