Parlamentario mr. drs. Richard Arends di Fraccion di AVP a entrega un carta na Presidente di Parlamento cu peticion na Gobierno di Aruba. A tuma nota cu na caminda tin 17 cambionan di ley fiscal cu actualmente ta na Raad van Advies y ta puntra Gobierno kico ta nan intencion.

Faltando algun dia pa aña caba, algun di e leynan aki lo mester drenta na vigor pa dia 1 di januari 2020. Den e carta cu a entrega, Richard Arends kier sa kico ta e intencion di Gobierno pa cu e fecha cu e leynan aki mester drenta na vigor. Tambe kico ta e embergadura di e leynan aki: kico e ta bay nifica pa e poder di compra y kico e ta bay nifica pa e peso di impuesto.

Parlamentario Richard Arends ta menciona tambe cu e prome fase di reforma fiscal cu e drenta na vigor na inicio di aña, no tabata nada otro cu un aumento di impuesto e comerciante y medida pa e ciudadano cu a sufri un perdida di poder di compra enorme. Preocupacion actual ta kico lo ta e consecuencianan cu e cambionan nobo aki lo nifica y si esaki ta locual cu Gobierno a palabra cu Hulanda recientemente durante bishita di Prome Minister.

Den e carta aki, un biaha mas fraccion di AVP ta trece su preocupacion padilanti cu Aruba lo ta drentanto pa di dos biaha consecutivo un aña nobo cu hopi incertidumbre, caminda comercio tampoco sa kico ta spera nan pa 1 di januari.

Richard Arends ta di opinion cu cu Gobierno mester splica kico ta spera nos locual ta trata e tema di impuesto y e reforma fiscal cu a anuncia. E proecupacionan aki tambe ta biba serca e ciudadano nan, como tambe gremio comercial. Hopi ta e peticionnan cu a bay caba pa splicacion, e biaha aki a baby un peticion pa contestanan por escrito.