Gobierno di MEP no a cambia nada den su ‘modus operandi’ den gobernacion ya cu loke ta tumando luga na e momentonan aki, caminda mescos cu den pasado ta tuma medida contra pueblo, nombra friens and family y ora cu no tin mas espacio pa medida y pueblo no ta acepta mas medida, nan ta bay over na tira atraco riba institutonan estatal manera Elmar, Setar, WEB y Utilites, Banco Central y recientemente ATA.
Benny Sevinger miembro di fraccion di AVP a mustra cu gabinete Wever Croes ta tira e atraconan aki pa yega presupuesto pa nan fiesta por sigui.
“Esey ta e modus operadi di e gobierno aki di MEP, un modus operandi di ‘friends and family’ caminda nada a cambia den e mentalidad di e partido aki compara cu pasado.
Tin un lista di tur miembro di famia di Prome Minister Evelyn Wever Croes y nan salarionan cu a sali den publicidad den ultimo lunanan.
Un lista cu ta mustra riba e realidad di gobernacion di partido MEP, caminda tin otro lista di tur e biahenan di e ministernan actual, caminda mas di 6 miyon a gasta na biahamento den apenas un aña y mey.
Tur e cosnan aki pero e ambtenaar nan kier duna un suma di 5 florin den nan salario pa motibo cu ta esey gobierno por duna na e momentonan aki y nada a cambia.
Di 2001 pa 2009 huurkosten di Noord End, famia di Evelyne Wever Croes, na 2001 a cobra 456.000 florin, na 2002 un suma di 494.000 florin, 2003 e suma di 606.000 florin, 2004, suma di 595.000 florin, na 2005 e suma di 578.000 florin, na 2006 e suma di 547.000 florin, na 2007 490.000 florin, na 2009 e suma di 380.000 florin pa un total di 4.5 miyon florin e compania Noordend di famia di Evelyn Wever Croes a cobra bou gabinete di Nelson Orlando Oduber.
Goldmine Properties di Evelyn su ruman difunto, di dje y di su papa, den 2004 ora nan a cuminsa, huur a costa 36.000 florin, 2005 a cobra 238.000 florin, 2006 e suma di 238.000 florin, 2007 suma di 238.000 florin, na 2008 e suma di 238.000 florin y na 2009 e suma di 237.000 pa un total di 1.2 miyon florin a wordo cobra na huur y paga cu placa di pueblo.
Tambe tin edificio di RemaZu, cu tambe ta di famia caminda a paga 1.1 miyon florin den e periodo di 2005 pa 2009.
Edificio di Arulex, edificio den cual sra Evelyn tin aandelen aden y di su tata cu tambe den aandelen aden, na 2002 a cobra 203.000 florin, 2003, 236.000 florin, na 2004 a cobra 366.000 florin, 2005 a cobra 366.000 florin, na 2006 e suma di 366.000 florin, 2007 e suma di 366.000 florin, na 2008 e suma di 355.000 florin, na 2009 un suma di 35.000 florin pa un suma total di 2.7 miyon florin na huur di e edificio aki.
Pa loke ta e Advokatenkantoor Croes Wever & Chong, na 2001 a wordo paga e suma di 261.000 florin, na 2002 e suma di 937.000 florin, na 2003 e suma di 652.000 florin, na 2004 e suma di 523.000 florin, na 2005 e suma di 550.000 florin, na 2006 e suma di 392.000 florin, na 2007 e suma di 185.000 florin, na 2008 e suma di 412.000 florin y na 2009 e suma di 180.000 pa un fotal di mas di 4 miyon cu a bay pa oficina di Croes Wever & Chong.
Esaki ta loke nos por a haya di financien, sin conta loke companianan estatal a paga na e kantoor di abogado aki den e mesun periodo ey.
Aki nos ta mira cu tin tambe ‘advieskosten’ di Croes NV un suma di 2.5 miyon a wordo paga y tur loke mi a menciona caba, pa un total di 16 miyon florin pa famia directo di sra Evelyn Wever Croes.
E reaccion di Prome Minister e tempo ey tabata di laba man y bisa cu su persona no tabata den politica pues no por tilda su persona di algo pero e cosnan aki tabata sali tur dia, con contractnan tabata wordo firma, saca articulo for di un contract caminda no por a anula e contract.
Prijsnan cu tabata wordo pone pa meter cuadra caminda DIP ta esun cu mester a stipula, no tabata na altura di loke tabata wordo paga y tur e contractnan tabata wordo traha den oficina ministernan di MEP.
Anto tur e tempo Ministerio Publico no a mira e documentonan aki, nan no a haci nada, ‘ze zijn niet zomaar iemand,’ pa investiga tur e parti di corupcion aki, pero ora cu nos a drenta den gobierno nos no tabatin tempo pa haci denuncia, ya cu nos tabatin un reto grandi nos dilanti, pa goberna e pais, mester a saca e pais for di e debacle y sake for di man di e grupo aki cu a enrikece nan mes e tempo ey.
Awo na 2019 nos ta mira cu nada a cambia, caminda sra Evelyn Wever Croes na comienso di su gobierno a declara cu e ta integro, cu e ta haci loke e ta bisa y ta bisa loke e ta haci.
Pero e prome lunanan di su gobierno, SVB tabata di bay huur edificio di Papa pa bay eyden y nos a bay para ey dilanti y denuncia e hecho aki y e ora Evelyn a core Sali y bisa cu SVB no ta bay eynan mas.
Si nos no a denuncia esaki SVB lo ta eyden awe y atrobe e mesun modus operandi pa strika miyones di florin, di placa di pueblo pero pa pueblo mes solamente tabatin medida y mas medida,” Parlamentario Benny Sevinger a declara.
