Parlamentario drs. Wyatt-Ras y su fraccion durante tratamento di e ley di ombudsman a ser silencia na un forma bruto no elegante y dictatorial dor di Ady Thijsen.
Segun Wyatt-Ras no tabatin ningun motibo pa esaki. A trata e ley di cual sra. Lopez-Tromp y sra. Wyatt-Ras ta unico miembronan iniciador di e ley cu ta den Parlamento ainda y ta pesey nan a sinta pa defende e ley aki.
Dicho ley a cuminsa cana su caminda desde 5 di juli 2016 y a ricibi conseho di Raad van Advies dia 15 di september 2016. Ya na 2014 a cuminsa reuni tocante di esaki. Gobierno anterior a facilita un kwartiermaker y lo mester a bin cambio den Constitution pa e ley por funcciona na e mihor manera. Despues cu gobierno a cambia na 2017 a tuma 2 anja y te par di luna pasa a bin un cambionan grandi den e ley cu awor lo mester ser trata. E iniciadornan a propone pa e ley ser manda pa Raad van Advies pa un conseho. Wyatt-Ras cu hunto cu Lopez-Tromp ta iniciadornan desde comienso di e ley aki a representa e comision di e constelacion aki di Parlamento y pa sorpresa di Wyatt-Ras na final di discurso di Lopez-Tromp e presidente sin respet pa democracia no a kier a laga Wyatt-Ras como iniciador tambe hiba palabra.
Wyatt-Ras ni su coleganan di fraccion y hasta otro coleganan di otro fraccion no por a compronde e forma di proceder di e presidente. Mervin Wyatt-Ras di basta tempo caba a ripara cu e Presidente aki a bin ta purba silencia Wyatt-Ras y su fraccion pa e por bulldoze cos den Parlamento. Segun Wyatt-Ras netamente den caso di ombudsman e presidente dictatorial aki no mag di haci loke el a haci, pues di stroba un iniciador pa hiba palabra djies paso e ta di oposicion. Esaki no ta promer biaha cu ta silencia oposicion. Anto netamente pa Wyatt-Ras cu ta sali na defensa di nos cuidadanonan.
Wyatt-Ras den pasado, dia 28 di september 2011, hunto cu sra. Lopez-Tromp ya caba a yega di presenta un mocion pa traha riba un kinderombudsman, cual mocion a ser aproba unanimamente. No ta democratico cu e presidente sin manera aki djies paso e mester bai Hulanda y kier tin e ley trata promer cu e bai, ta purba di silencia Wyatt-Ras. E odio cu Ady Thijsen kizas tin riba Mervin Wyatt-Ras a bira bisto.
E ley di ombudsman lo haci posibel cu nos pueblo ora e no ta di acuerdo e por acudi na e defensor di pueblo pa entrega keho. E defensor di pueblo segun ley lo mester atende cu e kehonan dentro di un termino y por intermedia cu instancianan pa yega na un mihor maneho y sali na derecho di cuidadanonan. E defensor di pueblo ta raporta na Parlamento. E ta un entidad independiente manera Raad van Advies y Algemene Rekenkamer cu lo yuda Parlamento haci un mihor trabou di control di gobierno. E lo por haci investigacion ariba su mes tambe. E ley aki despues cu e regresa for di Raad van Advies y cu a contesta preocupacionnan di Raad van Advies por ser trata den Reunion Publico.
