Fraccion di AVP den ultimo dos añanan, a yega di pidi varios informacionnan riba e rol cu e bufete di abogado d tata di Prome Minister Evelyn Wever Croes pero cu nunca a entrega e documentonan cu a wordo solicita.
Lider di fraccion di AVP, sr Marlon Sneek a mustra cu recientemente e lider di fraccion di MEP a declara den prensa cu el a bay departamento di financien pa busca recibonan riba otro oficinanan di abogado cu lo a traha pa companianan di utilidad pero cu e no a haya esakinan.
“Loke ta pasa ta cu e lider di fraccion di MEP, kende mi ta kere ta un hende inteligente, mester por sa bon bon cu el a bay adres robes pa busca e informacionnan aki ya cu ta trata di un NV di gobierno y ta na en NV e mester ta pa haya e recibonan aki.
Loke ta mas pret di esaki ta e hecho cu nos a manda puntra Prome Minister Evelyn Wever Croes pa nos haya informacion riba pago na e bufete di su tata pero el a reacciona bisando cu e no por duna informacion ya cu ta un compania NV.
Sinembargo dia cu nan kier a hunga wega sushi, buscando pa atacha e bon nomber di nos colega Richard Arends, ora cu Parlamentario Vrolijk a manda un carta pa Prome Minister puntrando pa haya documentonan kende tabata haci trabou pa RDA, mesora e documentonan aki a wordo duna.
Ora cu AVP a pidi pa recibonan di WEB, Elmar, Utilities y RDA, cual ta e cuater companianan estatal cu ta resorta bou di Prome Minister y cu su tata ta dunando servicio na e companianan aki, Evelyn a reacciona bisando cu e no por duna e documentonan aki ya cu ta trata di companianan NV y no por duna informacion.
Pues claramente ta scondemento tin y pa tal motibo nos di AVP a acudi na Ministerio Publico cu tin tur poder di ley pa manda pidi e documentonan aki y nan mester haya nan tambe pa asina e bay haci su huiswerk y wak na unda tin cosnan iregular a tuma luga y asina atende e iregularidadnan aki.
Minister Presidente Evelyn Wever Croes mester por sa di e cobransanan aki ya cu ta su bufete nan ta bay y den e documentonan cu nos a entrega na Ministerio Publico, tin specificacion caminda ta wordo bisa cu nan tabatin combersacion cu Prome Minister.
Es mas, riba un diadomingo nan lo mester a topa na un bbq, kisas na un cas y a cobra 700 florin pa esaki, a manda Prome Minister un whatsapp y a cobra 175 florin pa esaki, a manda un e-mail pa Premier y a cobra 375 florin pa esaki, pues e documentonan ta mustra cu tin contecto regular cu Prome Minister Evelyn Wever Croes.
Tambe tin dos abogado di e bufete cu a sinta c’un persona pero na momento di a cobra, un abogado a manda un cobransa di 1000 florin como su trabou cu e persona aki pero su colega tambe ta manda un cobransa di otro 1000 florin pa motibo cu e tambe a sinta den mesun combersacion aki.
Pues asina e dosnan aki di mesun bufete di abogado ta ranca 2000 florin pa mesun caso y asina nan ta strika y chica placa di pueblo y pa tal motibo nos ta kere cu Ministerio Publico tin suficiente trabou, tin suficiente prueba pa nan bay haci nan trabou riba e investigacion aki y duna pueblo claridad con ta gasta placa di pueblo.
E maniobra aki huridacamente ta dek tur dos abogado, pero na mes momento tur dos ta cobra mesun cantidad di 1000 florin pa mesun trabou di un combersacion y aki pueblo por mira cu asina cu nan papia, nan manda un mail, nan manda un whatsapp, pa tur cos gobierno tin cu paga e bufete di Papa, e bufete di Prome Minister Evelyn Wever Croes.
Nos ta kere cu si nan topa Prome Minister den gang mes, lo ranca placa di pueblo pa e topamento aki y si nan trece un grupo bin duna Conseho di Minister un presentacion, e abogadonan di e bufete aki lo contra pa sinta wak e grupo duna su presentacion, ta cobra 3500 florin.
Tur esaki den forma legal ya cu ta un bufete di abogado cu ta cobra pa su oranan loke ta nada straño pero nos ta keda cuestiona cu ta trata aki di bufete di abogado di Prome Minister Evelyn Wever Croes, cual bufete ta traha pa e Prome Minister, pa e por cobra y strika despues y pa nos di AVP esaki ta inaceptabel,” Parlamentario Marlon Sneek a declara.
