Dialuna den oranan di merdia miembronan di AVP a acudi na Ministerio Publico pa entrega documentonan cu ta mustra cu tin mal uzo di fondonan pueblo pa enrikese famia of personanan hopi cerca di Prome Minister Evelyn Wever Croes.
E miembronan aki di AVP cu ta forma parti di un organisacion den fundacion, cu yama Fundacion Anti-Enrikisemento ilicito y Proteccion di Patrimonio Nacional”, cu ta haci investigacion riba e tema, a entrega na Ministerio Publico un serie di documento cu e peticion pa cuminsa un investigacion penal. E dossier aki ta contene 18 “bijlage” cu nan ta considera di ta pruebanan cu ta indica kico ta tumando luga bou di e Gobierno aki. Un investigacion unda cu Prome Minister Evelyn Wever a haci su mes culpabel, na opinion di e denunciantenan, na algun cos cu nan ta sospecha di ta delitonan penal. Ta exigi pa Ministerio Publico atende cu e tema aki. Nan ta mira cu e Prome Minister ta envolvi den tumamento di decisionnan cu ta mal uza fondonan di pueblo pa enrikese cierto hendenan.
El a duna e ehempel cu e Prome Mandatario tin 4 departamento (empresanan estatal) cu ta cay directamente bou di dje, cu ta haciendo uzo di bufete di su tata. Mirando e conexion, e mandatario no mester a permiti cu ta haci uzo di e bufete specifico aki. Esaki siendo cu Prome Minister Wever Croes ta papia di integridad. E cambio pa uzo di bufete di e tata di Prome Minister a tuma luga un poco despues cu e Gobierno lidera pa Wever Croes a drenta. E mandatario, segun diferente documentonan entrega, tabata na altura cu e Bufete aki a bira esun oficial di e empresanan manera Utilities; RDA, WEB y ELMAR. Tur e miembronan di e Hunta ta ex politiconan di MEP of personanan hopi cerca di e partido of Prome Minister Wever Croes.
Vocero di fraccion di AVP Melvin Tromp a bisa cu nan ta spera cu Fiscalnan di Ministerio Publico cuminsa rapido riba e investigacion pa pone un paro lihe di e fiestanan aki. Na momento di haci denuncia, a papia di cinco punto cu ta aparece den e documentonan entrega: mal uzo di poder, enrikisemento ilegal; preferencia indebido; evasion di impuesto y trato preferencial.
Lider di fraccion di AVP Marlon Sneek a compaña Tromp y su delegacion, y na salida a bisa cu e situacion reinante ta hopi preocupante. Asina nan a entrega na Ministerio Publico recibonan paga door di Utilities na e bufete liga na Prome Minister Wever Croes, cu ta di su tata, cu ta core den mey miyon florin. Aki, Sneek a bisa, ta papia di solamente 2018 y no ta tur recibo a haya ainda tampoco. Manera ta conoci, Utilities ta resorta directamente bou di Prome Minister. Loke corecto den un caso asina, segun e Parlamentario ta bisa, ta pa e Prome Minister bisa cu e no kier pa e bufete di su tata traha of brinda servicio na ningun di e departamentonan cu ta cay bou di dje. Mas ainda pasobra e mandatario mes tin “shares” den e Bufete y ta haya dividendo na fin di aña, y ta un herededor di su tata. “Di e forma aki e mes ta percura pa e mes bay dilanti y esey no ta e forma corecto.” Diferente biaha a haci pregunta relaciona cu esaki na e mandatario, y ta bisa semper cu e no tin nada di haber. Pero Sneek ta señala cu Richard Eman, kende ta guia e Hunta di Supervision, ta nombra door di e Minister y ta sigui maneho di e Minister.
Tambe a entrega documentonan na Ministerio Publico cu ta bisa cu Prome Minister tabata forma parti di e combersacionnan. Y esaki pa nan ta hopi preocupante pasobra e ta demostra cu Prome Minister no ta informa Parlamento debidamente. Ta trata di un bulto di 120 producties cu diferente transaccion y decisionnan. “Ta keda na Ministerio Publico awo pa haci su trabou. Nos ta spera cu Ministerio Publico por demostra cu berdaderamente nan ta transparente. Esaki ta e momento pa demostra esey. Awe tin un dossier y mi ta spera cu nan haci algo cun’e. Nos lo bishita bek pa mira ki dia ta haya contesta riba e keho. Nos kier duna nan e beneficio di duda y ta spera warda,” Sneek a bisa.
