Para memey di un grupo grandi di ciudadanonan preocupa di San Nicolas riba un Dialuna mainta A cu manece di solo e lider di AVP, mr. Mike Eman a transmiti e inketud cu e a bin ta sinti serca nos comunidad. Eman: “unda mi yega e pueblo ta puntrami te ki dia nan tin cu sigui soporta e carga aki di Gabinete Wever-Croes.
Nos t’aki awe, e lider di AVP a expresa na esnan presente y na henter nos comunidad den un declaracion nacional, den un cura humilde di Famia Rudy Tromp na San Nicolas, cu e ta sinti como sirbidor di e pueblo cu e momento a yega pa libra e pueblo for di e sufrimento cu Gabinte Wever Croes ta creando pa ciudadanonan di nos Pais.
Locual nos ta wak den tiendanan y supermercado na aumentonan astronomico di costo di bida causa pa un gobierno cu a subi su gastonan cu mas di 100 miyon florin y kier pa pueblo paga p’e. Tur esaki bou di e capa di medida pa paga debe, pero awe nos ta mira cu debe di Aruba no a baha nada, pero si e debe di cada famia ta aumentando drasticamente na man di tur e medidanan. Cifranan di Centraal Bureau Statistieken ta confirma tur e dolor cu pueblo ta experiencia den e aumento di prijsnan.
E ulimo cifra di CBS cu ta mustra kico un (1) persona mester pa sobrebibi of cuater (4) persona, dos (2) adulto y dos (2) jiu a subi cu Afl. 300,= pa luna, Afl. 3600,== pa anja pa un (1) persona y a subi cu Afl. 600,= pa luna pa cuater (4) persona pa luna y ta Afl. 7200 pa anja compara cu e cifranan di December 2017. Es decir un aumento dramatico entre December 2017 y Augustus 2019.
Pobresa y hamber ta birando un realidad penoso den miles di cas na Aruba. Nos no mag como sociedad accepta e rumbo aki pa nos pais. Inhusticia social, desigualdad di entrada y di oportunidad lo impacta nos comunidad pa un tempo hopi largo cu tur su conquencianan negative, mr. Mike Eman a expresa cu hopi preocupacion hunto cu un cantidad di ciudadano cu a bin comparti cune nan inketud na San Nicolas. Eman a bisa cu den 8 anja di gobernacion semper a keda pone atencion na fortifica e poder di compra di nos ciudadanonan den tur forma, pero awe e gobierno aki ta ranca so di pueblo y crea pobresa y hamber.
