Minister di Serlimar, Otmar Oduber a masacra Serlimar y awor e ta na careda pa Parlamento pa haya placa pa tapa e buraconan cu el a habri, e lider di fraccion di AVP, sr Marlon Sneek ta mustra.

“Siman pasa caba mi a bisa cu si nos analisa e ‘tweede kwartaal rapportage’ di 2018 en comparasion cu esun riba mesun periodo di 2019,  nos ta mira cu na 2018 Serlimar su gastonan tabata para na 7.3 miyon florin y riba mesun periodo aki pa 2019, Serlimar su gastonan ta para na algo mas cu 19 miyon florin.

Pues 12 miyon florin mas cu aña pasa y si nos coy cu falta seis luna mas saliendo for die kwartaal rapportage ey, nos tin cu conta cu Serlimar e aña aki ta gastando 24 miyon florin mas cu aña pasa.

Dor si esey por mira e ansha di Minister Otmar Oduber pa pasa e ley di Serlimar ya cu tin mester di placa pa cera e buraco ey den presupuesto prome cu traha presupuesto supletorio y e wordo confronta ta di unda e tin cu bay saca e miyonnan aki cu el a gasta sin cu e tabatin ‘dekkingsmiddel’  pa e gastonan aki y awor e kier core pasa un ley pa haya placa pa tapan e buraconan aki.

Esey ta e parti di sinceridad cu minister tin cu mustra y bisa comunidad kico bo ta haciendo y kico bo ta bay haci ora cu bo a crea entre otro pa Serlimar bay huur un edificio for di un amigo di bo, pa 50 mil  florin pa luna, creando asina un debe extra pa Serlimar di casi mey miyon florin pa aña.

Anto sin conta cu ta trahadonan di Serlimar mes mester a bay drecha e edificio ey prome cu nan por a drenta den esaki y e cosnan aki pa fraccion di AVP ta keda puntonan di discusion y pesey nos a  manda pidi mas documento y nos ta spera di por haya e documentonan aki prome cu e reunion sigui.

Algo cu nos tin nos duda aden mirando e hecho cu ainda no a logra di convence partnernan den coalicion pa sostene e para cu nan ta tirando pa e proyecto di Serlimar,” Parlamentario Marlon Sneek a mustra.