No a dura mucho dia, cu atrobe Minister mr. Andin Bikker ta den noticia negativo, e biaha aki pa un lista di problemanan na Warda di Polis na Santa Cruz. Despues di un tremendo accion di Warda Costa y Polis, cu a tuma un gran cantidad di droga den beslag, nos ta bolbe mira cu ta laga esunnan cu ta haciendo un bon trabou den husticia na caya. Separa di “schimmel” den e edificio cu ta haciendo e Polisnan malo, awo a opta pa trece henter un cargamento grandi di droga den e edificio, un otro reto pa salud di hende, sin lubida aspectonan di siguridad. “M’a ta cuanto eror mas e Minister aki tin cu comete anto prome cu tur hende ripara cu e sapatonan di Minister ta kedand’e mucho grandi y complica pa e compronde?”, asina Robert Candelaria, Parlamentario di e fraccion di AVP den Parlamento ta puntra. 

“Cada bes Polisnan ta acerca mi rabia cu varios problema facil pa soluciona, pero parce cu deliberadamente e Minister ta laga para y keda sin tuma decision, te ora cu e situacion empeora y complica. Lamentablemente e mandatario a rondona su mes cu cantidad di hurista como conseheronan bon paga, pero sea nan consehonan ta robes of e mandatario no ta sigui nan”, di acuerdo cu Robert Candelaria. E no por caba di compronde con un solo Minister por pone henter nos sistema hudicial bou presion asina y laga tur cu ta traha eyden mustra masha malo. 

Den pasado, ora Polisnan score y gara un cargamento grandi asina, ta tuma “sample” di un parti di e droga, manda laboratorio y su tras ta destrui e droga mesora den fornonan grandi special. Mas lihe haci esaki, menos presion riba Polisnan cu mester cuida e cargamento. E biaha aki ta un cargamento mas grandi ainda, pues ta bin acerca e retonan cu e acetona ey tin pa salud di tur cu ta traha den e edificio. 

“Mi ta urgi Minister Andin Bikker pa tuma e trabou aki mas na serio. Decisionnan descabeya asina ta hinca salud y bida di hende den peliger, innecesariamente”, asina Parlamentario Robert Candelaria a termina bisando. 

#####